રાજ્યમાં વર્ષના અંતિમ દિવસે કોરોના વાઇરસના 780 કેસો નોંધાયા, 4ના મોત

2020ના છેલ્લા દિવસે પણ કોરોનાના કેસ ઘટ્યા. 31 ડિસેમ્બર 2020ના રોજ ગુજરાતમાં કોરોના વાયરસના 780 નવા કેસ નોંધાયા છે. રાજ્યમાં કોરોનાના નવા કેસમાં ઘટાડો જોવા મળી રહ્યો છે. જોકે, રાજ્યમાં કોરોનાના થતા ટેસ્ટની સંખ્યા પણ ઘટી છે. તો બીજી તરફ સાજા થવાનો દર 94 ટકાને પાર પહોંચ્યો છે. રાજ્યમાં એક્ટિવ કેસ ઘટ્યા છે સાથે મહાનગરોમાં પણ કોરોનાના કેસ 200થી ઓછા નોંધાયા છે.

• કોરોનાના આજે 780 નવા કેસ નોંધાયા
• કુલ આંકડો 2,45,037 પર પહોંચ્યો
• 916 દર્દીઓ સાજા થયા અને 4 દર્દીના મોત

અમદાવાદઃ રાજ્યમાં વર્ષના અંતિમ દિવસે ગત 24 કલાક દરમિયાન કોરોનાના 780 નવા કેસ સામે આવ્યા છે. જેથી ગુજરાતમાં અત્યાર સુધીમાં 2,45,037 દર્દીઓ નોંધાઇ ચૂક્યા છે. રાજ્યમાં કોરોનાથી સાજા થવાનો દર 94.23 ટકા થયો છે. તો ગુજરાતમાં આજે 54,672 ટેસ્ટ કરવામાં આવ્યા છે. જેથી અત્યાર સુધીમાં કુલ 96,52,780 ટેસ્ટ કરવામાં આવ્યા છે.

રાજ્યમાં 10 હજારથી ઓછા એક્ટિવ કેસ

રાજ્યના સ્વાસ્થ્ય વિભાગ દ્વારા જાહેર કરવામાં આવેલી માહિતી અનુસાર, રાજ્યમાં આજે 916 દર્દી સાજા થયાં છે તો અત્યાર સુધીમાં કુલ 2,30,893 દર્દીઓ સાજા થયાં છે. તો હાલ 9 હજાર 839 એક્ટિવ કેસ છે. જેમાંથી 61 દર્દીઓ વેન્ટિલેટર પર છે. રાજ્યમાં કોરોનાના ટેસ્ટિંગની ક્ષમતા પણ વધારવામાં આવી છે. આજે રાજ્યમાં કુલ 54,672 ટેસ્ટ કરવામાં આવ્યા છે. રાજ્યની વસ્તીને ધ્યાને લેતા ટેસ્ટ પ્રતિ મિલિયન 841.11 જેટલા થાય છે. રાજ્યમાં અત્યાર સુધીમાં કુલ 96,52,780 ટેસ્ટ કરવામાં આવ્યા છે. કોરોનાના કારણે ક્વોરન્ટાઇન કરવામાં આવ્યા હોય તેવા લોકોની સંખ્યા આજની તારીખે 5 લાખ 5 હજાર 314 છે, જે પૈકી 5,05,195 વ્યક્તિઓ હોમ ક્વોરન્ટાઇન છે અને 119 વ્યક્તિઓને ફેસિલિટી ક્વોરન્ટાઇનમાં રાખવામાં આવ્યા છે.

કોરોના અપડેટ

ગુજરાતમાં આજે 4 દર્દીના મોત

આજે કોવિડ-19થી 4 દર્દીઓના મોત થયા છે, તો રાજ્યમાં કોરોનાથી મૃત્યુ પામનારાઓની સંખ્યા વધીને 4 હજાર 306 થઇ ગઇ છે. આજે અમદાવાદમાં 3 અને સુરતમાં 1 આમ 24 કલાક દરમિયાન કુલ 4 લોકોના કોરોનાથી મોત થયા છે. ત્યારે છેલ્લા કેટલાક મહિનાઓથી સૌથી વધુ દર્દીઓના અમદાવાદમાં મૃત્યુ થઇ રહ્યા છે.

મહાનગરોમાં કેસ ઘટ્યા! અમદાવાદ શહેરમાં 154 પોઝિટિવ

અમદાવાદ કૉર્પોરેશનમાં આજે 154, સુરત કૉરર્પોરેશનમાં 119, વડોદરા કૉર્પોરેશનમાં 106, રાજકોટ કૉર્પોરેશનમાં 64, વડોદરામાં 29, કચ્છ 28, સુરત 26, દાહોદ 24, રાજકોટ 22, ભરૂચ 20, ખેડા 14, ગાંધીનગર 13, ગાંધીનગર કૉર્પોરેશન 13, પંચમહાલ 13, મહેસાણા 12, મોરબી 11, જુનાગઢ 11, જુનાગઢ કૉર્પોરેશન 9 અને સાબરકાંઠામાં 9 કેસો નોંધાયા છે. આજે 780 નવા કોરોનાના કેસ નોંધાયા છે. તો હાલ કોરોનાના કુલ કેસનો આંકડો 2,45,037 પર પહોંચ્યો છે.