CAA-NRC: સુરતમાં શાહીન બાગની જેમ જાહેર કાર્યક્રમ યોજવા મુદ્દે હાઇકોર્ટે રાહત ન આપી

દિલ્હીના શાહીનબાગમાં CAA, NRC અને NPRને લઈને જે વિરોધ ચાલી રહ્યો છે. વિરોધ નોંધાવવા સુરતની ઓમ નગર સોસાયટીમાં જાહેર કાર્યક્રમ યોજવા સામે સ્થાનિક પોલીસ દ્વારા પરવાનગી ન અપાતા દાખલ કરાયેલી રિટ મુદ્દે ગુજરાત હાઇકોર્ટે અરજદારને કોઈપણ પ્રકારની વચ્ચગાળા રાહત આપવાનો ઇનકાર કર્યો છે. જ્યારે 28મી અને 29મી જાન્યુઆરીના રોજ વિરોધ પ્રદર્શનની પરવાનગી મુદ્દે નોટિસ પાઠવી ખુલાસો માગ્યો છે.

અમદાવાદ: સુરત શહેરની ઓમ નગર સોસાયટીમાં CAA, NRC અને NPRના વિરોધમાં જાહેર કાર્યક્રમ ખાનગી સ્થળ પર યોજવા મુદ્દે દાખલ કરાયેલી અરજી પર સરકારી વકીલ તરફે રજૂઆત કરવામાં આવી હતી કે, 29મી જાન્યુઆરીના રોજ થયેલી હિંસામાં આ પોલીસ સ્ટેશન વિસ્તારમાં 200 લોકો સામે ફરિયાદ દાખલ કરવામાં આવી છે. આવી પરિસ્થિતિ વચ્ચે જાહેર કાર્યક્રમ ની પરવાનગી આપી શકાય નહીં.

જે વાતને કોર્ટે માન્ય રાખી હતી. હાઇકોર્ટમાં દાખલ કરેલી રિટમાં અરજદાર દ્વારા રજૂઆત કરવામાં આવી છે કે, ઓમનગર સોસાયટી ખાનગી સ્થળ હોવા છતાં પોલીસ પાસેથી પરવાનગી માંગવામાં આવી હતી, પરંતુ પોલીસે 2 વખત તેમની અરજી ફગાવી દેતા હાઇકોર્ટમાં રિટ દાખલ કરી હતી. 28મી અને 29મી જાન્યુઆરીના રોજ વિરોધ પ્રદર્શન માટે પોલીસે પરવાનગી ન આપતા હાઇકોર્ટે સ્થાનિક લીંબયત પોલીસ સ્ટેશનને નોટિસ પાઠવીને ખુલાસો માંગ્યો છે.