ત્રણ પગ સાથે જન્મેલી બાળકીની સિવિલ હોસ્પિટલમાં કરાઈ સફળ સર્જરી

અમદાવાદઃ શહેરમાં એક બાળકીનો ત્રણ પગ સાથે જન્મ થયો હતો. બાળકી 5 દિવસની થઈ તે બાદ ડૉક્ટર દ્વારા વિચારણા કરીને બાળકીની સર્જરી કરીને ત્રીજો પગ દૂર કરવામાં આવ્યો છે. સફળ ઓપરેશન પછી આ બાળકી હાલમાં સલામત છે.

માતા-પિતાને લગ્નના ઘણા વર્ષો બાદ ઘરે પારણું બંધાયું હતું તેમને એક બાળકીનો જન્મ થયો હતો. પરંતુ બાળકીના જન્મ થતા જ ત્રીજો પગ પણ આવતા માતા-પિતા ચિંતાતુર બન્યા હતા. તબીબી ભાષામાં તેને પાયરો મેલીયા કહેવાય છે. તેને સારવાર માટે સિવિલ હોસ્પીટલમાં ખસેડવામાં આવી હતી. જ્યાં પીડીયાટ્રીક વિભાગમાં બાળકીની સારવાર ચાલી રહી હતી.એક્સપર્ટ ડૉકટર્સ માટે આ બાળકીની સારવાર એક ચેલેન્જ હતી.એક્સપર્ટ ડોક્ટર્સે આ અંગે ચર્ચા વિચારણા કરીને બાળકીની સર્જરી કરવાનું નક્કી કર્યું હતું.

બાળકીના એક્સ-રે, સોનોગ્રાફી અને પરીક્ષણ કરીને બાળકીને જન્મના 5 દિવસ પૂર્ણ થતા સર્જરી કરવામાં આવી હતી. લગભગ દોઢ કલાક જેટલા સમય સુધી સર્જરી ચાલી હતી.સર્જરી દરમિયાન બાળકીને શરીરના અન્ય કોઈ ભાગને નુકસાન ન થાય તે અંગે પૂરેપૂરું ધ્યાન રાખવામાં આવ્યું હતું. દોઢ કલાકની સફળ સર્જરી થયા બાદ ડોક્ટર્સે રાહતનો શ્વાસ લીધો હતો.