અમદાવાદ પોલીસ કસ્ટોડીયલ ડેથઃ પોલીસ સ્ટેશનના PSOને સસ્પેન્ડ કરાયા

અમદાવાદના કાગડાપીઠ પોલીસ સ્ટેશનમાં યુવકે ગળે ફાંસો ખાઈ આપઘાત કર્યો હતો. આ મામલે મૃતકના પરિવારે પોલીસ અને અન્ય લોકો પર હત્યાનો આક્ષેપ લગાવી મૃતદેહનો સ્વીકાર કર્યો ન હતો. જે કારણે પોલીસે પરિવારની માગ સ્વીકારી ફરજ પર હાજર PSOને સસ્પેન્ડ કર્યા છે. તેમજ દોષીતો સામે કાર્યવાહી કરવાની બાંહેધરી આપી છે.

અમદાવાદઃ કાગડાપીઠ પોલીસ સ્ટેશનમાં સોમવાર રાત્રે યુવકે ગળે ફાંસો ખાઈ આપઘાત કર્યો હતો. આ સમગ્ર મામલે પોલીસે કોઈ પગલાં લીધા ન હતા, જેથી પરિવારજનો રોષ સાથે પીએમ રૂમની બહાર જ ધરણાં પર બેસી હતા.

મૃતકના પરિવારજનોએ સેકટર-2 જેસીપી નિપુણ તોરવણેને આ ઘટના બાબતે રજૂઆત કરી હતી. જે બાદ ફરજ પર હાજર PSO ગોરધાનસિંહને તાત્કાલિક સસ્પેન્ડ કરવામાં આવ્યા છે. તેમજ ઈસનપુર પોલીસ સ્ટેશનના PSI કે. પી. ગોહિલને કાગડાપીઠ મુકવામાં આવ્યા છે.

ડી-સ્ટાફને પણ વિડ્રો કરવામાં આવશે, અને તમામ પોલીસકર્મીઓ અન્ય પોલીસ સ્ટેશનમાં મુકવામાં આવશે. તેમજ દોષીતો સામે કાર્યવાહી કરવાની બાંહેધરી આપી છે, જેથી પરિવારે મૃતદેહનો સ્વીકાર કર્યો હતો.