અમદાવાદમાં વધુ એક માનસિક અસ્થિર યુવતી બની દુષ્કર્મનો શિકાર

અમદાવાદ: શહેરમાં મહિલાઓની સલામતી જોખવાઇ રહી છે. ત્યારે છેલ્લા 10 દિવસમાં છેડતીના 5થી વધુ બનાવો બની ચુક્યા છે. તો બીજી તરફ હવે માનસિક રીતે અસ્થિર અને નિ:સહાય યુવતીઓને પણ હવસખોરો પોતાનો શિકાર બનાવી રહ્યાં છે. ત્યારે શહેરમાં પરપ્રાંતીય યુવતી સાથે દુષ્કર્મ થયો હોવાની ઘટના સામે આવી છે.

શહેરમાં આવેલા નવરંગપુરાની કમલાબાગ સોસાયટી પાસે એક યુવતી નિ:સહાય હોવાની જાણ પોલીસને કરવામાં આવી હતી. ત્યારબાદ પોલીસે ઘટનાસ્થળે પહોંચીને યુવતીને પોલીસ સ્ટેશન લઈ આવીને પૂછપરછ હાથ ધરી હતી. પરંતુ તે સમયે તેણી કશું જણાવી શકી ન હતી.

ત્યારબાદ યુવતીનું મેડિકલ ચેકઅપ કરાવવામાં આવ્યું હતું, ત્યારે તપાસમાં તેને ગર્ભ હોવાનું બહાર આવ્યું હતું. આ યુવતી પર કોઇ અજાણ્યા વ્યક્તિએ દુષ્કર્મ આચરી તેને ગર્ભવતી બનાવી હોવાને લઇને નવરંગપુરા પોલીસે અજાણ્યા વ્યક્તિ સામે બળાત્કારનો ગુનો નોંધ્યો છે.

નવરંગપુરા PI પી. બી. દેસાઇના જણાવ્યા પ્રમાણે, મહિલા પરપ્રાંતીય હોવાનું જણાઇ રહ્યું છે. સોશિયલ મીડિયા અને ટેક્નિકલ સર્વેલન્સના આધારે યુવતીના પરિવારજનોની શોધખોળ હાથ ધરવામાં આવી છે.

અત્રે ઉલ્લેખનીય છે કે, આ અગાઉ પણ શહેરમાં આવેલા સાબરમતી વિસ્તારમાં બે યુવતી સાથે દુષ્કર્મ આચરીને તેને ગર્ભવતી બનાવી દેવાની ઘટના સામે આવી હતી.