175 નોન-જયુડીશીયલ સ્ટેમ્પ માટે લાયસન્સ અપાયા

ગાંધીનગર : ગુજરાત સ્ટેમ્પ ફીઝીકલ નોન-જયુડીશીયલ સ્ટેમ્પ પેપરનું વેચાણ બંધ કરાયુ છે. પરંતુ અમદાવાદ જિલ્લામાં નાગરિકોને સરળતાથી નોન-જયુડીશીયલ સ્ટેમ્પ પેપર મળી રહે તે માટે જિલ્લા કલેકટર દ્રારા એક બેઠક યોજવામાં આવી હતી. ઇ-સ્ટેમ્પીંગ લાયસન્સ મેળવવા માટે 5 સ્ટેમ્પ વેન્ડ, 160 નોટરી, 16 ચાર્ટર્ડ એકાઉન્ટન્ટ, 5 કંપની સેક્રેટરી તેમજ 4 બેંકો દ્વારા અરજીઓ કરાઈ હતી. જેમા 175 અરજીઓને લાયસન્સ ઇસ્યુ કરવા માટે સુપ્રિ. ઓફ સ્ટેમ્પ્સની કચેરી, ગાંધીનગર દ્વારા તાત્કાલિક મંજુરી આપી છે. 70 જેટલા અરજદારોને USER ID અને PASSWORD ફાળવી દેવામાં આવ્યા છે. હાલમાં 70 જેટલા નવા ACC સેન્ટર પરથી પણ સ્ટેમ્પ મળી શકે છે.

સરકારે જાહેરાત કર્યા બાદ અમદાવાદ જિલ્લામાં છેલ્લાં 18 દિવસમાં અંદાજે 37476 જેટલા ઇ-સ્ટેમ્પીંગ સર્ટીફીકેટ ઇસ્યુ કરવામાં આવ્યા છે. અંદાજે સરેરાશ પ્રતિદિન 2900 ઇ-સ્ટેમ્પીંગ સર્ટીફીકેટ ઇસ્યુ કરવામાં આવ્યા હતા. 1 ઓક્ટોબર થી 18 ઓક્ટોબર સુધી 13061 જેટલા દસ્તાવેજોની નોંધણી કરાઈ હતી. જેમાં ઇ-સ્ટેમ્પીંગ સર્ટીફીકેટ આધારે રૂા.12.81 કરોડ અને ફ્રેન્કીંગ આધારે રૂા.94.77 કરોડની વસુલાત કરાઈ હતી. સ્ટેમ્પ ડયુટી મુલ્યાંકનતંત્રના અધિકારીએ કહ્યુ કે, હાલમાં અમદાવાદમાં 60 ઇ-સ્ટેમ્પીંગ કેન્દ્રો અને 169 બેંકોમાં ફ્રેન્કીંગ મશીનની સુવિધા ઉપલબ્ધ છે.

રાજ્ય સરકાર દ્વારા સ્ટેમ્પ વેન્ડર, નોટરી, ચાર્ટર્ડ એકાઉન્ટન્ટ, કંપની સેક્રેટરી તેમજ બેંકોને પણ ઇ-સ્ટેમ્પીંગ લાયસન્સ આપવાનું નકકી કરવામાં આવેલ છે. અમદાવાદ જિલ્લાની કોર્ટમાં સ્ટેમ્પ વેન્ડર્સ નોન-જયુડીશીયલ અને જયુડીશીયલ સ્ટેમ્પનું વેચાણ કરી શકે છે. સ્ટેમ્પ વેન્ડર્સે તા.1 ડિસેમ્બર 19 બાદ નોન-જયુડીશીયલ ફીઝીકલ સ્ટેમ્પનું વેચાણ બંધ થશે. પરંતુ 1 ડિસેમ્બર 19 બાદ જયુડીશીયલ સ્ટેમ્પ તેમજ કોર્ટ ફી લેબલનું વેચાણ ચાલુ રહેશે.

અમદાવાદમાં મીરજાપુર કોર્ટમાં સ્ટોક હોલ્ડિંગ કોર્પોરેશન ઇન્ડિયા લીમીટેડ દ્વારા છેલ્લા ત્રણ વર્ષથી ઇ-સ્ટેમ્પીંગ કાઉન્ટર કાર્યરત કરાયુ છે. લાલદરવાજા પાસે અપના બજારના પાંચમાં માળે સબ રજીસ્ટ્રાર કચેરી ખાતે ઇ-સ્ટેમ્પીંગ કાઉન્ટરની સુવિધા, લાલદરવાજા ખાતે આવેલ સ્ટેટ બેંક ઓફ ઇન્ડિયા તેમજ કર્મચારી કો.ઓપ.બેંક લીમીટેડમાં ,મેટ્રોપોલીટન અને એકઝિકયુટીવ મેજીસ્ટ્રેટની કોર્ટ, ઘી-કાંટા ખાતે આવેલ સબ રજીસ્ટ્રાર કચેરી,અમદાવાદ-1(સીટી) ખાતે પણ ઇ-સ્ટેમ્પીંગ કાઉન્ટરની સુવિધા ઉપલબ્ધ છે.