અમદાવાદનું કાલુપુર શાક માર્કેટ છૂટક ગ્રાહકો માટે બંધ

કોરોના લૉક ડાઉનની સ્થિતિમાં જીવનજરુરી ચીજવસ્તુઓ લેવા માટે લોકો મોટી સંખ્યામાં બહાર નીકળી રહ્યાં છે. જેમાં દૂધ અને શાકભાજી-કરિયાણાંની ખરીદી સૌથી વધુ છે, ત્યારે કાલુપુર શાક માર્કેટ જેવા વિશાળ બજારને રીટેઇલ ગ્રાહક માટે બંધ કરવામાં આવ્યું છે. જેનાથી ભીડ ટાળી શકવાનો આશાવાદ છે.

અમદાવાદ: કોરોનાવાઇરસ ફેલાતો અટકાવવા માટે અમદાવાદ મ્યુનિસિપલ કોર્પોરેશન સતત પગલાં ભરી રહ્યું છે. આ પગલાં અંતર્ગત કાલુપુર શાકમાર્કેટને છૂટક ગ્રાહકો માટે બંધ કર્યું છે. કાલુપુર શાકમાર્કેટ અમદાવાદનું સતત ધમધમતું માર્કેટ છે. અત્યારે કોરોનાવાઇરસના કારણે શહેરના લોકોનું ધ્યાન રાખવું તે કોર્પોરેશનની ફરજ બને છે. એટલે જ ભીડભાડવાળી જગ્યાઓ તેઓ ખાલી કરાવે છે. જેથી આ વાઇરસના ફેલાવાને અટકાવી શકાય.

અમદાવાદ મ્યુનિસિપલ કોર્પોરેશન દ્વારા કાલુપુર માર્કેટને છૂટક ગ્રાહકો માટે બંધ કરવામાં આવ્યું છે. જેથી ભીડ થતી અટકે. હવે ફક્ત જથ્થાબંધ વેપારીઓ જ અહીંથી માલ ખરીદીને પોતાના વિસ્તારમાં વેચી શકશે. જથ્થાબંધ વેપારીઓ કાલુપુર માર્કેટમાંથી માલ ખરીદીને તેને અમદાવાદના જુદા જુદા વિસ્તારના છૂટક વેપારીઓને વેચશે. જેથી શહેરમાં શાકભાજી પૂરતા પ્રમાણમાં મળી રહેશે.