ચાંદખેડામાં કીર્તી રો-હાઉસમાં ડિમોલીશન માટે હાઈકોર્ટનો મનાઈ હુકમ

અમદાવાદઃ ચાંદખેડાના કીર્તી રો-હાઉસ પાસે કાયદેસર પ્લોટનો કેટલોક હિસ્સો ડિમોલીશનના ભાગરૂપે તોડી પાડવાના કોર્પોરેશનના આદેશ સામે રિટ દાખલ કરવામાં આવી છે. ત્યારે બુધવારે ચીફ જસ્ટીસ વિક્રમનાથ અને બિરેન વૈષ્ણવની ખંડપીઠે કોર્પોરેશનના આદેશ પર મનાઈ હુકમ આપ્યો છે. આ મામલે વધું સુનાવણી 23મી ડિસેમ્બરના રોજ હાથ ધરવામાં આવશે.

અરજદાર વતી હાઈકોર્ટમાં દાખલ કરાયેલી પીટીશનમાં રજુઆત કરવામાં આવી છે કે, પ્લોટ નંબર 26માં કરવામાં આવેલા બાંધકામને લઈને 2001માં સતાધિશો પાસેથી પરવાનગી આપવામાં આવી હતી. એ અંગેનો સર્વે મેપ પણ દર્શાવવામાં આવ્યો હતો. અરજદારનો આક્ષેપ છે કે તેમની સામે આવેલી સ્કીમના લોકોએ ગેરકાયદેસર બાંધકામ કર્યું છે. આ અંગે કોર્પોરેશનને અનેકવાર રજુઆત કરાઈ હોવા છતાં પગલા લેવાયા નથી. અરજદારે પોતાના પ્લોટ મુદે મંજુરી મળ્યા હોવાના દસ્તાવેજ પણ રજુ કર્યા હતા.

કોર્પોરેશને ટીપી સર્વે નંબર 84માં અરજદારના રો-હાઉસમાં આવેલ પ્લોટનો કેટલોક હિસ્સો તોડી પાડવા માટેની નોટીસ પાઠવી હતી. આ મુદે અરજદાર વતી જવાબ પણ રજુ કરવામાં આવ્યા હતા. જોકે લેખિત અને મૌખિક રજુઆતને ધ્યાનમાં ન લેવાતા હાઈકોર્ટમાં રિટ દાખલ કરાઈ હતી. હાઈકોર્ટે આ મામલે હાલ પ્લોટનો કેટલોક હિસ્સો તોડી પાડવાના આદેશ પર મનાઈહુકમ આપ્યો છે.