'દિયા ધ વન્ડર ગર્લ' ફિલ્મ ટૂંક સમયમાં ગુજરાતી પડદે જોવા મળશે. આ ગુજરાતી ફિલ્મ છે જે બાયોપિક પર આધારિત છે. જેમાં દિયા નામની છોકરીના જીવનની નિષ્ફળતા, સંઘર્ષ અને સફળતાની કહાણી દર્શાવવામાં આવી છે.
ગુજરાતની સૌપ્રથમ બાયોપિક ફિલ્મ 'દિયા - ધ વંડર ગર્લ'નું ટ્રેલર અને મ્યુઝિક થયું લોન્ચ આ કહાણી અમદાવાદમાં રહેતી 9 વર્ષીય દિયાની છે. જે માતાની પ્રેરણાથી એક વર્ષના ટૂંકાગાળામાં સખત મહેનત કરી ટેકવોન્ડોમાં સબ જુનિયર માર્શલ આર્ટ્સ નેશનલ ગોલ્ડ મેડલ વિજેતા બને છે.
આ ફિલ્મ છોકરીઓને પથરો માની, તેને ધૂધકારનાર સમાજની વિચારસરણીને પડકારે છે. દિયાની માતા તેને પોતાની લડત જાતે લડવા અને દરેક પરિસ્થિતીમાં સામે અડીખમ ઉભી રહેવા માટે તૈયાર કરે છે. દિયાને માર્શલ આર્ટ્સ શીખવા પ્રેરે છે. પરંતુ, સબ જુનિયર ડિસ્ટ્રિક્ટ લેવલ ટૂર્નામેન્ટમાં ભાગ લેતી વખતે દિયા તેના વિરોધી દ્વારા ખરાબ રીતે ઘાયલ થાય છે, ત્યારબાદ તેને પોતાની તાલીમ છોડવી પડી છે. પરંતુ, તે હાર નથી માનતી અને પ્રેક્ટીસ ચાલું રાખે છે.
કહેવાય છે ને કે, સતત પ્રયાસ સફળતાની નિશાની છે. બસ, આ જ વાત દિયાની કાહણીમાં જોવા મળે છે. અડગ નિશ્ચય, આત્મવિશ્વાસની અને સખત મહેનત પરિણામે દિયા રાષ્ટ્રીય ગોલ્ડ મેડલ જીતે છે. જે પોતાની ખામી સાથે તે સમાજની વિચારસરણીને પણ હરાવે છે. આમ, દિયા પરિવારના સભ્યો અને સમગ્ર ગુજરાતી સમુદાયને ગૌરવ અપાવે છે.
આ ફિલ્મનું બ્રેડી એન્ટરટેનમેન્ટ પ્રાઇવેટ લિમિટેડ દ્વારા નિર્માણ કરવામાં આવ્યું છે. પવન જી. મોરારકા દ્વારા પ્રોડ્યુસ કરવામાં આવી છે. જેના દિનેશ જે. સિંઘાલ ફિલ્મના ક્રિએટિવ પ્રોડ્યુસર છે. આ ફિલ્મની પટકથા સુરેશ બિશ્નોઇએ લખી છે અને દિગ્દર્શન પણ કર્યુ છે. જતીન અને પ્રતિક દ્વારા સંગીત આપવામાં આવ્યું છે.
ઉલ્લેખનીય છે કે, ફિલ્મની મુખ્ય અભિનેત્રી દિયા પટેલ કેમેરાનો સામનો કરવા માટે કોઈ અજાણી વ્યક્તિ નથી. તે ગુજરાતમાં બેટી બચાવો અભિયાનની પોસ્ટર ગર્લ રહી ચૂકી છે. તેમજ ત્રિપલ તલાક અંગેની ફિલ્મ 'ફિર ઉસી મોડ પર' એક દીકરીની ભૂમિકા નિભાવી છે. ફિલ્મમાં દિયાના કોચની ભૂમિકા ભજવનારા સૂરજ વાધવા રીઅલ લાઇફમાં ટેકવોન્ડો ટ્રેનર છે.
આ ફિલ્મની સ્ટારકાસ્ટમાં દિયા પટેલ મુખ્ય ભૂમિકામાં છે. દીવેયા દ્વિવેદી માતા કિંજલ પટેલની ભૂમિકામાં છે. જયારે ચંન્દ્રેશ કંસારા પિતા જીગ્નેશ પટેલની ભૂમિકામાં છે. આ ઉપરાંત ફિલ્મમાં સુરજ વાઢવા કોચ, ભાવિની જાની, હરીશ ડાગીયા, પ્રેમલ યાજ્ઞિક, સોનાલી નાણાવટી, શિવાની પાંડે, દેવ પટેલ, વીકી શાહ અને કૃપા પંડ્યા અન્ય ભૂમિકાઓમાં જોવા મળશે.
