Gujarat Weather: સ્વેટર ધાબળા રાખજો તૈયાર; આ તારીખથી ગુજરાતમાં પડશે કાતિલ ઠંડી

રાજ્યમાં હાલ વાતાવરણ સૂકું જોવા મળી રહ્યું છે. હવામાન વિભાગે હાલ રાજ્યમાં કોઈ કમોસમી વરસાદની આગાહી કરી નથી. પરંતુ ડિસેમ્બરના અંતમાં કાતિલ ઠંડીનો દોર શરૂ થશે એવું હવામાન નિષ્ણાત અંબાલાલે જણાવ્યું છે.

અમદાવાદ:કમોસમી માવઠા બાદ રાજ્યના હવામાનમાં ખાસ મોટો ફેરફાર જોવા મળી રહ્યો નથી. જો કે ડિસેમ્બર મધ્ય એટલે ફૂલબહારમાં શિયાળો જામતો હોય છે. પરંતુ આ વર્ષે કંઈ ખાસ ઠંડીમાં વધારો જોવા મળ્યો નથી. હવામાન વિભાગે જણાવ્યું છેકે, નબળા વેસ્ટર્ન ડિસ્ટર્બન્સ અને અલ નીનોના કારણે જોઈએ તેવી ઠંડી પડી રહી નથી.

શું કહ્યું અંબાલાલે:હવામાન નિષ્ણાંત અંબાલાલ પટેલની આગાહી પ્રમાણે નાતાલ સુધીમાં હવામાનમાં મોટા ફેરફાર આવી શકે છે. 16-18 ડિસેમ્બરે વેસ્ટર્ન ડિસ્ટર્બન્સ પાકિસ્તાનથી ઉત્તર ભારત તરફ ગતિ કરશે. 18મી ડિસેમ્બર બાદ ઉત્તરીય પર્વતીય પ્રદેશમાં હિમવર્ષા થશે. ઉત્તર ભારતમાં માવઠું થઈ શકે છે. 23 મી ડિસેમ્બરે ગુજરાતમાં પણ માવઠાની સંભાવના છે. જાન્યુઆરી માસ પણ ઠંડો રહેશે સાથે આ વર્ષે ફેબ્રુઆરી સુધી ઠંડીનો મારો રહેશે.

ક્યાં કેટલું નોંધાયું તાપમાન
શહેર	તાપમાન
અમદાવાદ	16.5
ડીસા	13.4
ગાંધીનગર	14.9
વડોદરા	16.4
સુરત	21.4
વલસાડ	19
દ્વારકા	19
પોરબંદર	16.3
રાજકોટ	14.5
સુરેન્દ્રનગર	16.2

રાજ્યમાં હાલ ઉત્તર પૂર્વના પવનો ફૂંકાઇ રહ્યા છે. રાજ્યમાં આગામી 5 દિવસ સુધી વાતાવરણ સૂકું રહેશે. માવઠાની કોઈ શક્યતા કરવામાં આવી નથી. જોકે તાપમાન 2 થી 3 ડિગ્રી વધી શકે છે. આ વધારાનું મુખ્ય કારણ વાતાવરણમાં ભેજ અને વાદળો છવાયા હોવાથી તાપમાન ઊંચકાશે. અમદાવાદમાં 15.8 ડિગ્રી સાથે સિઝનની સૌથી વધુ ઠંડી નોંધાઈ છે. તો નલિયામાં સૌથી વધુ 10.5 ડિગ્રી તાપમાન નોંધાયું છે.

ઠંડી નહિ વધે: મોટે ભાગે ડિસેમ્બરમાં ઠંડીનો પારો નીચે જતાં કડકડતી ઠંડી જોવા મળે છે. પરંતુ આ વખતે દર વર્ષની જેમ ઠંડી નથી. ત્યારે હવે હવામાન વિભાગે ફરી વાર આવનારા સપ્તાહને લઈને કરેલી આગાહી પ્રમાણે રાજ્યમાં આગામી 5 દિવસ સુધી વાતાવરણ સૂકું રહેશે. વાતાવરણમાં ભેજ અને વાદળો છવાયેલા હોવાથી ઠંડીનું પ્રમાણ નહિ વધે.