Gujarat Crime : ગુજરાતમાં કાયદો અને વ્યવસ્થા વિભાગ દ્વારા મહત્વનો નિર્ણય, ગંભીર ગુનાની તપાસ બાબતે કરાયા ફેરફાર

ગુજરાતમાં ગંભીર ગુનાની તપાસ બાબતે કેટલાક ફેરફાર કરાયા છે. કાયદો અને વ્યવસ્થા વિભાગ દ્વારા ગુના સ્થળ પર અધિકારીઓની તપાસ અને વૈજ્ઞાનિક તપાસ પધ્ધતિને લઈને મહત્વનો નિર્ણય સામે આવ્યો છે. તપાસની ગુણવત્તા સુધારવા માટે અધિકારીઓ-સુપરવાઇઝરી અધિકારીઓને તાલીમ શિબિરનું આયોજન કરવા સૂચના આપવામાં આવી છે.

અમદાવાદ : રાજ્યના કાયદો અને વ્યવસ્થા વિભાગ દ્વારા મહત્વનો નિર્ણય લેવામાં આવ્યો છે, વિભાગ દ્વારા સત્તાવાર આપવામાં આવેલી પ્રેસ વિજ્ઞાપ્તિ મુજબ
ખૂન, ખૂનની કોશિશ, લૂંટ, લૂંટનો પ્રયાસ અને 50 હજારથી વધુની ઘરફોડ ચોરી, રમખાણો, પોલીસ અધિકારીઓ વિરૂધ્ધના કેસો, ગંભીર પ્રકારના માર્ગ અકસ્માતો અને રેલને ગ્રીસ કરવી અથવા છેડછાડ કરવી વિગેરે પ્રકારના ગુનાઓને હવેથી સ્પેશિયલ રિપોર્ટ ક્રાઈમ તરીકે ગણવામાં આવે છે. આવા પ્રકારના ગુનાઓમાં સર્કલ પોલીસ ઇન્સ્પેક્ટર, સબ-ડિવિઝનલ પોલીસ ઓફિસર અને પોલીસ અધિક્ષક, આસિસ્ટન્ટ પોલીસ કમિશનર અને કમિશનરેટ વિસ્તારોમાં નાયબ પોલીસ કમિશનર, રેન્કના પોલીસ અધિકારીઓ બનાવવાળી જગ્યાની મુલાકાત, તપાસ કરનાર અમલદારને માર્ગદર્શન આપી તપાસ પુરી કરાવા માટેની જોગવાઇ ગુજરાત પોલીસ મેન્યુઅલમાં કરવામાં આવી છે.

સ્પેશિયલ રિપોર્ટ :તાજેતરના સમયમાં બેંકિંગ, વીમા, ઔદ્યોગિક ઉત્પાદન, વાણિજ્ય અને અન્ય આર્થિક પ્રવૃત્તિઓના ઝડપી વિકાસને કારણે આર્થિક ગુનાઓમાં વધારો થયો છે. ઝડપી આર્થિક વિકાસ માટે આર્થિક ગુનાઓની રોકથામ, શોધ અને તપાસ પર ધ્યાન કેન્દ્રિત કરવાની જરૂર છે. જેથી 5.00 કરોડ અને તેથી વધુના આર્થિક ગુનાઓ જેમાં IPCની કલમ 403, 404, 405 થી sec.409 sec.420 વિગેરે ગુજરાત પ્રોટેક્શન ઓફ ઈન્ટરેસ્ટ ઓફ ડિપોઝિટર્સ, નાણાંકીય સંસ્થાઓમાં અધિનિયમ, 2003 હેઠળના કેસોને સ્પેશિયલ રિપોર્ટ ક્રાઈમ તરીકે વર્ગીકૃત કરવામાં આવ્યા છે.

મહિલા-બાળકોની સુરક્ષા પર ભાર : એ જ રીતે, સલામત અને ન્યાયી સમાજ બનાવવાના પ્રયાસો માટે મહિલાઓ અને બાળકોની સુરક્ષા મહત્વપૂર્ણ બની ગઈ છે. ગૃહ વિભાગ, સરકાર ગુજરાત અને ગૃહ મંત્રાલય, સરકાર ભારત મહિલાઓ અને બાળકોની સુરક્ષા પર ભાર આપી રહ્યું છે. જેથી, બાળકો સામે બળાત્કાર અને જાતીય અપરાધોના કેસો જેમાં IPC ની કલમો 376, 376-A, 376-B, 376-C, 376-D અને 376-E અને POCSO Act, 2012ને સ્પેશિયલ રિપોર્ટ ક્રાઈમ તરીકે ઉમેરો કરવામાં આવ્યો છે.

અધિકારીઓની સ્થળની મુલાકાત : સંબંધિત પોલીસ સ્ટેશનોમાં ઉપરોક્ત ગુનાઓ નોંધવામાં આવે ત્યારે તે અંગે વિશેષ અહેવાલ મોકલવામાં આવશે અને વરિષ્ઠ પોલીસ અધિકારીઓ ગુનાના સ્થળની મુલાકાત લઇ, કેસની હકીકત તપાસી, ભૌતિક પુરાવાઓ એકત્રિત કરી, તપાસ અધિકારીને વૈજ્ઞાનિક તપાસ પધ્ધતિ અને ઝડપી ધરપકડ કરવા અંગે મદદ કરી માર્ગદર્શન આપશે.

સજા કરવામાં સફળતા :CID (ક્રાઇમ એન્ડ રેલ્વે), ગુજરાત રાજ્યને આર્થિક ગુનાઓ, બળાત્કાર અને પોક્સો એક્ટ, 2012 હેઠળના કેસોની તપાસ અંગેના કાયદા, કાર્યપધ્ધતી વગેરેને આવરી લેતું વિશેષ તાલીમ મોડ્યુલ ડિઝાઇન કરવા અને ગુજરાત પોલીસ એકેડેમી, કરાઈ સાથે સંકલનમાં તપાસની ગુણવત્તા સુધારવા માટે તપાસ અધિકારીઓ અને સુપરવાઇઝરી અધિકારીઓને તાલીમ શિબિરનું આયોજન કરવા સૂચના આપવામાં આવી છે. ઉપરોક્ત પ્રયાસોથી ફોજદારી કેસોની તપાસની ગુણવત્તામાં સુધારો આવશે અને સંડોવાયેલ આરોપીઓને સજા કરવામાં સફળતા મળી શકશે.