નિવૃત્ત DGPને ખોટી રીતે ફસાવી બદનામ કરવાનો મામલો અમદાવાદ:રાજ્યના એક નિવૃત DGPને ખોટી રીતે ફસાવવાનું ષડયંત્ર સામે આવતા ચકચાર મચી છે. સામે આવેલી માહિતી પ્રમાણે સ્થાનિક ભાજપના નેતાઓ અને પત્રકારોએ મળીને એક મહિલા સાથે ખોટું કામ કર્યું હોવાનું ખોટું સોગંદનામું કરાવવાનું કાવતરું રચ્યું હતું. એક બનાવટી એફિડેવિટ બનાવવામાં આવી હતી. જે સોશિયલ મીડિયામાં વાઈરલ થતાં એટીએસ દ્વારા તપાસ હાથ ધરાઈ હતી.
ભાજપના રાજકીય નેતા અને બે પત્રકારની સંડોવણી નિવૃત્ત DGPને બદનામ કરવાનો ખેલ: ગુજરાતના પૂર્વ IPS અને નિવૃત્ત DGPને બદનામ કરવા માટે ખેલ રચવામાં આવ્યો હતો. એક બનાવટી એફિડેવિટ બનાવવામાં આવી હતી. જે સોશિયલ મીડિયામાં વાઈરલ થતાં એટીએસ દ્વારા તપાસ હાથ ધરાઈ હતી. તપાસ દરમિયાન અનેક પાસા ખુલ્યા હતા. જેમાં ભાજપના નેતા અને બે પત્રકારના નામ સામે આવ્યા હતા. ગુજરાત ATS દ્વારા આ મામલે પાંચ લોકોની ધરપકડ કરવામાં આવી છે. જેમાં જી.કે પ્રજાપતિ, હરેશ જાદવ, મહેન્દ્ર પરમાર ઉર્ફે રાજુ જેમીની, આશુતોષ પંડ્યા અને કાર્તિક જાનીને ઝડપી લેવામાં આવ્યા છે.
આ પણ વાંચો:નિવૃત PSI અને નીચેની કેડર સક્ષમ પોલીસ કર્મચારીને ટૂંકા ગાળા માટે સેવામાં લેવાશે: DGP
2 પત્રકારે 5 લાખનો કર્યો તોડ:BJP ઓબીસી મોરચાના સ્થાનિક નેતાઓએ બે પત્રકારો સાથે મળીને 8 કરોડ રૂપિયાનો તોડ કરવાનું પ્લાનિંગ કર્યું હતું. બે ઉચ્ચ અધિકારીને ફસાવી દેવાનું કાવતરૂ હતું. સામે આવેલી વિગતો મુજબ સ્થાનિક ભાજપના નેતાઓ અને પત્રકારોએ મળીને એક મહિલા સાથે દુષ્કર્મનો કેસ કરી પ્લાન બનાવ્યો હતો અને તે અંગેનું ખોટું સોગંદનામું કરીને આખું ષડયંત્ર ઘડ્યું હતું. આ સાથે જ એફિડેવિટને સોશિયલ મીડિયામાં વાયરલ કરવા માટે બે પત્રકારોએ પાંચ લાખ રૂપિયા લીધા હતા. એફિડેવિટને અખબારમાં પ્રકાશિત કરીને બ્લેકમેલ કરીને પૈસા પડાવવાનો આ સમગ્ર પ્લાન કર્યો હોવાનો તપાસ દરમિયાન ખુલાસો થયો છે.
આ પણ વાંચો:Veraval Crime : વેરાવળના નામાંકિત તબીબનો આપઘાત, ઘટનાસ્થળેથી મળી સુસાઈડ નોટ
ભાજપના સ્થાનિક નેતાનું નામ આવ્યું સામે:30મી જાન્યુઆરી 2023 ના રોજ મહિલા પેથાપુર પોલીસ સ્ટેશનમાં નોંધાવેલી ફરિયાદ મામલે મેજિસ્ટ્રેટ સમક્ષ નિવેદન આપવા માટે જવાની હતી. તે વખતે જી.કે પ્રજાપતિ અને હરેશભાઈએ મહિલાને ગમે તેમ કરીને મેજિસ્ટ્રેટ સમક્ષ રૂબરૂ હાલ નિવેદન આપવા ન જવા માટે સમજાવી હતી અને તેને મેજિસ્ટ્રેટ સમક્ષ બેભાન થઈ જઈ મુદ્દત પડાવવા માટે સમજાવી હતી. હરેશે આ કામ માટે મહિલાને ઊંઘની ગોળીઓ ખવડાવી મેજિસ્ટ્રેટ સમક્ષ મોકલી હતી અને તેના નિવેદનમાં કોઈ પોલીસ અધિકારીનું નામ હાલ પૂરતું ન લખાવવા માટે દબાણ કર્યું હતું અને કહ્યું હતું કે જો કોઈ પોલીસ અધિકારીનું નામ લખાવશો તો અમારું બધું કામ બગડી જશે અને અમે તમને કોઈ જાતની મદદ કરી શકીશું નહીં.
આઠ કરોડ રૂપિયા પડાવવાનું ષડયંત્ર:જેના કારણે મહિલા ડરી જતા તેણે મેજિસ્ટ્રેટ સમક્ષ નિવેદન લખાવતી વખતે કોઈ પોલીસ અધિકારીનું નામ લખાવ્યું ન હતું. જે બાદ મહિલાની જાણ બહાર એફિડેવીટમાં નવા ફકરા ઉમેરીને મહિલાને વંચાવ્યા વિના જ પહેલી ફેબ્રુઆરી 2023ના રોજ પરિવાર મહિલાની સહી કરાવીને આરોપીઓ એક કાવતરું ઘડીને પોલીસ અધિકારીને દબાણમાં લાવીને તેઓની પાસેથી બળજબરીથી આઠ કરોડ રૂપિયા પડાવવાનું ષડયંત્ર રચ્યું હતું.
5 આરોપીઓની ધરપકડ:આ અંગે ગુજરાત એટીએસના એસપી સુનિલ જોશીએ જણાવ્યું હતું કે આ ઘટનાની ગંભીરતા લઈને એટીએસએ તપાસ કરી મહિલાના નિવેદનના આધારે ગુનો દાખલ કરી 5 આરોપીઓની ધરપકડ કરી છે અને તપાસ ગાંધીનગર એસઓજીને આપવામાં આવી છે આ ગુનામાં જે આરોપીઓના નામ ખુલશે તેઓની પણ ધરપકડ કરવામાં આવશે.
