નળસરોવર અભ્યારણમાં પક્ષીઓનો શિકાર અટકાવવા ટાસ્ક ફોર્સની કરાઈ રચના

અમદાવાદ: નળસરોવર અભ્યારણના રક્ષણ માટે હાઈકોર્ટમાં સુઓ મોટો અરજી દાખલ કરવામાં આવી હતી. જે મુદ્દે શુક્રવારે કાર્યકારી ચીફ જસ્ટીસ અનંત દવે અને બિરેન વૈષ્ણવની ખંડપીઠ સમક્ષ રાજ્ય સરકારે એક્શન પ્લાન દર્શાવતા જી.આર પ્લાનમાં ટાસ્ક ફોર્સની રચના કરી છે. જેમાં પક્ષીઓના શિકાર અટકાવવા અને સ્થાનિક લોકોને સ્વર્નિભર સહિતની બાબતોનો સમાવેશ થતાં કોર્ટે રિટનો નિકાલ કર્યો છે.

નળસરોવર પક્ષી અભ્યારણમાં પક્ષીઓ અને પર્યાવરણને થતાં નુકસાનને અટકાવવા માટે સરકારે 11 ઉચ્ચ અધિકારીઓની નિમણુક કરતી ટાસ્ક ફોર્સની રચના કરી છે. અમદાવાદ અને સુરેન્દ્રનગરના કલેક્ટર, પોલીસ અધિક્ષક, જિલ્લા વિકાસ અધિકારી, મત્સ્યોદ્યોગ અધિકારી અને વન સંરક્ષક સહિતના સભ્યોને ટાસ્ક ફોર્સના સભ્યો તરીકે નિમણુક કરાયા છે.

નળ સરોવરના રક્ષણ માટે ગત બે મહિનામાં ટાસ્ક ફોર્સની રચના સિવાય લેવાયેલા અન્ય પગલા મુદ્દે સરકાર તરફથી રજુઆત કરાઈ હતી. નળ સરોવર અભ્યારણમાં સફાઈ ઝુંબેશ હાથ ધરવામાં આવી છે. જેના ભાગરૂપે નળ સરોવરમાંથી હજારો કિલો પ્લાસ્ટિક અને ફિશિંગ નેટ બહાર કાઢવામાં આવી હતી. સાથે જ જમીન નીચે ધસી ગયેલા પ્લાસ્ટિકને પણ ડ્રેગિંગ દ્વારા દુર કરવામાં આવ્યો છે. વન અને પર્યાવરણ વિભાગે અભ્યારણમાં પ્લાસ્ટિક સાથે પ્રવેશવા મુદ્દે સંપૂર્ણપણે પ્રતિબંધ લાદવામાં આવ્યો છે.

વન અને પર્યાવરણ વિભાગના મદદનિશ મુખ્ય સચિવની બેઠક યોજવામાં આવી હતી. જેમાં નળ સરોવરના રક્ષણ મુદ્દે ચર્ચા-વિચારણા હાથ ધરવામાં આવી હતી. એટલું જ નહી રાજ્ય સરકારે મર્યાદિત સમયગાળા સુધીમાં અભ્યારણમાં પ્રવેશવા મુદ્દે પ્રતિબંધ કરવામાં આવ્યો છે.

ટાસ્ક ફોર્સની કામગીરી

• ટાસ્ક ફોર્સ નળ સરોવર અને કાંઠા વિસ્તારના ગામોમાં પક્ષીઓના શિકાર સામે કાર્યવાહી કરશે.
• નળ સરોવર અને આસપાસના વિસ્તારમાં પાયાની સુવિધાઓના વિકાસ તેમજ સ્વચ્છતા જાળવશે.
• નળ સરોવર અભ્યારણ્ય પર આજીવિકા માટે નિર્ભર લોકો માટે વૈકલ્પિક રોજગારી તેમજ આજીવિકા વૃદ્ધિ માટે પગલાં લેવાશે.
• પક્ષી રક્ષણ માટે સ્થાનિક ગ્રામજનોનો સહયોગ પ્રાપ્ત કરીને આનુષાંગિક કાર્યવાહી કરાશે.