દિનુ બોઘાના પરિવારમાંથી 14 લોકોના કોરોના રિપોર્ટ પોઝિટિવ, જામીન માટે હાઈકોર્ટમાં કરી અરજી

વર્ષ 2010 અમિત જેઠવા હત્યા કાંડ કેસના મુખ્ય આરોપી અને ભાજપના પૂર્વ સાંસદ દીનું બોઘાના પરિવારમાં 14 લોકોનો કોરોના રિપોર્ટ પોઝિટિવ આવતા તેમણે 30 દિવસના વચગાળાના જામીન મેળવવા માટે ગુજરાત હાઈકોર્ટમાં અરજી દાખલ કરી હતી. હાઈકોર્ટે આ મુદ્દે સરકારી વકીલને વેરિફિકેશન કરવાનો આદેશ કર્યો છે.

અમદાવાદ: હાઇકોર્ટમાં દાખલ કરવામાં આવેલી અરજીમાં રજૂઆત કરવામાં આવી છે કે દિનુ બોઘાના પરિવારમાંથી 14 લોકોના કોરોના રિપોર્ટ પોઝિટિવ આવ્યા છે. ત્યારે ઘરના સૌથી વધુ સભ્ય હોવાથી તેમની જરૂર છે અને તે માટે તેમને ત્રીસ દિવસના વચગાળાના જામીન આપવામાં આવે તેવું અરજીમાં લખવામાં આવ્યું છે.

સરકારી વકીલે અરજદારની પિટિશનમાં કરવામાં આવેલા આક્ષેપનો વિરોધ કર્યો હતો. હાઈકોર્ટે સરકારી વકીલને સમગ્ર સ્થિતિનો તાગ મેળવી રિપોર્ટ રજૂ કરવાનો આદેશ કર્યો છે. અગાઉ પણ દિનુ બોઘાને ઘણીવાર વચગાળાના જામીન ગુજરાત હાઇકોર્ટ દ્વારા આપવામાં આવ્યા છે. વર્ષ 2019 માં અમદાવાદ સિટી સિવિલ અને સેશન્સ કોર્ટ આરટીઆઇ એક્ટિવિસ્ટ અમિત જેઠવાની હત્યા કેસમાં પૂર્વ સાંસદ દીનુ બોઘા અને અન્ય બે આરોપીઓને આજીવન કેદની સજા ફટકારી હતી. નીચલી કોર્ટના આદેશને દિનુ બોઘા દ્વારા હાઈકોર્ટમાં પડકારવામાં આવ્યો છે.આ સમગ્ર કેસની વિગત એવી છે કે ગીર સોમનાથના RTI એક્ટિવિસ્ટ અમિત જેઠવાની વર્ષ 2010માં ગુજરાત હાઈકોર્ટના ગેટ સામે ગોળી મારીને હત્યા કરી દેવામાં આવી હતી. ત્યારબાદ પૂર્વ સાંસદનું નામ સામે આવતા તેમની ધરપકડ કરવામાં આવી હતી.