નિત્યાનંદ આશ્રમમાં સગીરા સાથે દુર્વ્યવહાર અને બાળકોને ગોંધી રાખવાના કેસમાં અમદાવાદ મિરઝાપુર ગ્રામ્ય સેસન્સ કોર્ટે બંને સાધિકા પ્રાણપ્રિયા અને તત્વપ્રિયાની જામીન અરજી ફગાવી દીધી હતી. અગામી દિવસોમાં બંને સંચાલિકા હાઈકોર્ટમાં જામીન અરજી દાખલ કરે તેવી શક્યતા વ્યકત કરવામાં આવી રહી છે. 2 ડિસેમ્બરના રોજ અમદાવાદ મિરઝાપુર ગ્રામ્ય સેસન્સ કોર્ટે બંને સંચાલિકાઓની જામીન અરજી ફગાવતા મહત્વનું અવલોકન કર્યું હતું કે, બંને વિરૂદ્ધ ગંભીર ગુનો છે અને જો તેમને જામીન આપવામાં આવે તો સમાજ પર વિપરીત અસર પડી શકે છે.
કોર્ટે નિત્યાનંદ આશ્રમની બંને સંચાલિકાઓના જામીન ફગાવ્યા બંને સાધિકાઓની ગંભીર ગુના સંડોવણી હોવાથી તેમને કોર્ટે જામીન આપ્યા નથી. આશ્રમની સંચાલિકા પ્રાણપ્રિયા અને તત્વપ્રિયાના વકીલ તરફે દલીલ કરવામાં આવી છે કે, તેમના અસીલ વિરૂધની ફરિયાદ ખોટી છે. 7 વર્ષ બાદ ગુનામાં સંચાલિકાઓને નોટીસ આપવાની ફરજ પડી છે. બંને સાધિકાઓને નોટીસ વગર ધરપકડ કરાયા હોવાની દલીલ કરવામાં આવી હતી.
ઉલ્લેખનીય છે કે, 27મી નવેમ્બરના રોજ પોલીસે વધુ રિમાન્ડની માગ ન કરતા આરોપીઓને પોલીસ કસ્ટડીમાં મોકવામાં આવ્યા હતા. 27મી નવેમ્બરના રોજ દાખલ કરવામાં આવેલી વચ્ચગાળાની જામીન અરજી કોર્ટે ફગાવી દીધી હતી.
બંને સંચાલિકા વતી કોર્ટમાં વચ્ચગાળાની જામીન અરજી દાખલ કરવામાં આવી હતી. જો કે, મૂળ રેગ્યુલર જામીન અરજીની સુનાવણી 30મી નવેમ્બરના રોજ નિયત હોઈ કોર્ટે બંનેની વચ્ચગાળાની જામીન અરજી ફગાવી હતી. અગાઉ વિવેકાનંદનગર પોલીસે તપાસ માટે વધુ ત્રણ દિવસના રિમાન્ડની માગ કરી હતી. કોર્ટે બંને મહિલા આરોપીઓના 27મી નવેમ્બર બપોરે 1 વાગ્યા સુધીના રિમાન્ડ મંજુર કર્યા હતા.
નિત્યાનંદના યોગિનીસર્વાજ્ઞપીઠમ આશ્રમમાં 4 બાળકોને ગોંધી રાખવાનો પોલીસે નિત્યાનંદ, પ્રાણપ્રિયા અને તત્વપ્રિયા વિરૂધ પોલીસ ફરિયાદ દાખલ કરી હતી. ફરિયાદ નોંધાયા બાદ પીડિત પરિવારને ધમકી મળતી હોવાના આક્ષેપ સાથે પોલીસ પ્રોટેક્શનની માંગણી કરી હતી. અગાઉ પોલીસે બંને સંચાલિકાઓને આશ્રમ ન છોડવાની નોટીસ ફટકારી હતી.
