કોરોનાએ ફિક્કો પાડ્યો ધુળેટીનો રંગ, જાણીતી ક્લબોએ કરી સામૂહિક ઉજવણી રદ

કોરોના વાયરસના કારણે લોકોમાં ભારે ફફડાટ પેસી ગયો છે. આ ચેપી વાયરસને ફેલાવાની તક ન મળે તે માટે શહેરની મોટાભાગની ક્લબોએ હોળીની ઉજવણી અને અન્ય કાર્યક્રમો રદ કર્યા છે. રાજપથ ક્લબ, કર્ણાવતી ક્લબ અને ગુલમહોર ક્લબે આવતા અઠવાડિયે યોજાનારી ધુળેટીની ઉજવણી રદ કરવાનો નિર્ણય લીધો છે.

અમદાવાદઃ રંગોનો તહેવાર ધૂળેટી કોરોના વાઈરસના ડરને કારણે ફિક્કો પાડ્યો છે. અમદાવાદની જાણીતી ક્લબોમાં સામૂહિક રેઇન ડાન્સ જેવા કાર્યક્રમો શહેરીજનો માટે આકર્ષણનું કેન્દ્ર બનતાં હોય છે. જેમાં એનઆરઆઈ અને વિદેશી મહેમાનો પણ રંગોત્સવ ઉજવતાં હોય છે. આવી ઉજવણી આ વર્ષે રદ કરી દેવામાં આવી છે. વિવિધ ક્લબો પોતાના મેમ્બરોને મેસેજ કરીને જાણ કરી રહી છે. ‘અમે ક્લબના પરિસરમાં યોજાનારી હોળીની ઉજવણી રદ કરી છે. અમારે ત્યાં હોળી બે વર્ષ બાદ યોજાનારી હોવાથી સભ્યો ખૂબ ઉત્સાહિત હતા. પરંતુ વાયરસના સંક્રમણના જોખમને લઈને આરોગ્ય તેમજ સલામતીે જળવાઈ તેથી આ નિર્ણય લેવામાં આવ્યો છે’, તેમ કર્ણાવતી ક્લબના પ્રમુખ એન.જી. પટેલે કહ્યું હતું.

રાજપથ ક્લબે પણ સભ્યોને આ વખતે હોળીની ઉજવણી નહીં થાય તેવા મેસેજ મોકલ્યાં છે. ‘WHO તેમ જ આપણી સરકારે Covid-19થી બચવા માટે સાવચેતીના ભાગરૂપે ભીડ એકઠી ન કરવી જોઈએ તેવી એડવાઈઝરી જાહેર કરી છે. 10 માર્ચે એટલે કે ધૂળેટીના દિવસે રેઈન ડાન્સનું આયોજન કરવામાં આવ્યું હતું, જે હવે કેન્સલ કરાયું છે’, તેવો મેસેજ રાજપથ ક્લબના સભ્યોને મોકલવામાં આવ્યો છે.આંતરરાષ્ટ્રીય મહિલા દિવસની ઉજવણીનો કાર્યક્રમ પણ ક્લબે રદ કર્યો છે. ક્લબના રિસેપ્શન પરથી તમારૂં રિફંડ કલેક્ટ કરી લેવા વિનંતી’, તેવું મેસેજમાં કહેવાયું છે.‘Covid-19 સામે સાવચેતીના ભાગરૂપે ક્લબના મેનેજમેન્ટે 10 માર્ચે યોજાનારા રેઈન ડાન્સના કાર્યક્રમને કેન્સલ કરવાનો નિર્ણય લીધો છે’, તેવો મેસેજ ગુલમહોર ક્લબે તેના સભ્યોને મોકલ્યો છે.