ગટર સાફ કરવાના મુદ્દે નિયમોનું પાલન ન કરાવનારા કોન્ટ્રાકટર સામે ફરિયાદ દાખલ થશે

અમદાવાદ : ગટર કે ટાંકા સાફ કરતી વખતે કર્મચારીઓના મૃત્યુ ન થાય તે માટે સુપ્રીમ કોર્ટે 6 વર્ષ પહેલાં અમુક પ્રકારના આદેશ બહાર પાડ્યાં હતા. જેના અમલીકરણ મુદ્દે જસ્ટીસ એસ.આર બ્રહ્મભટ્ટ અને એ.પી. ઠાકરની ખંડપીઠ સમક્ષ રાજ્ય સરકારના શહેરી વિકાસ મંત્રાલય દ્વારા જવાબ રજૂ કરવામાં આવ્યો હતો.જેમાં કર્મચારીઓને મેન્યુઅલ સ્કેવેજિંગના નિયમો વિરૂદ્ધ કામ કરાવનારા વ્યકિત વિરૂદ્ધ કામ કરવાનાર લોકો અને કોન્ટ્રાક્ટર વિરૂદ્ધ ક્રિમિનલ ફરિયાદ દાખલ કરવામાં આવશે.

મેન્યુઅલ સ્કેવેજિંગને લગતા કેસમાં જવાબ રજૂ કરતા રાજ્ય સરકારે રજૂઆત કરી હતી કે, ગટર કે ટાંકા સાફ કરતી વખતે કર્મચારીઓના મોત ન નીપજે તેના માટે સુચના સાથેના પરિપત્ર બહાર પાડવમાં આવ્યા છે. જેમાં કોઈપણ કર્મચારીને સાફ કરવા માટે ગટર કે ટાંકામા ન ઉતરવાની સલાહ આપવામાં આવી છે. આ નિયમોનું અમલ કરાવા મુદે ચીફ મ્યુનિસિપલ ઓફિસરને જવાબદારી સોંપવામાં આવી છે. આ મુદ્દે શું કામગીરી કરવામાં આવી તેના પર નજર રાખવા યોગ્ય સમયે મીટીંગનું પણ આયોજન કરવામાં આવે છે.

રાજ્ય સરકાર દ્વારા રજૂ કરવામાં આવેલા જવાબ મુદ્દે હાઈકોર્ટે અસંતોષ વ્યકત કર્યો હતો. સરકારને ફરીવાર રિપોર્ટ રજૂ કરવાનો આદેશ આપ્યો હતો. પહેલા પણ હાઈકોર્ટે રાજ્ય સરકારને ગટર કે ટાંકા સાફ કરવામાં ઉપયોગી થતા ઉપકરણો લાવવામાં આવ્યા છે કે કેમ, કેટલા લોકો મૃત્યું પામ્યા છે. અને શું વળતર ચુકવવામાં આવ્યું છે. સહિતની વિગતો રિપોર્ટમાં રજૂ કરવાનો હુકમ કર્યો છે.

અરજદારે રાજ્યમાં ચાલતી મેન્યુઅલ સ્કવેંજિંગની પ્રવૃત્તિના ભાગરૂપે ગટર કે ટાંકા સાફ કરવા ઉતરતા લોકોના મોત ન થાય અને દુર્ઘટનાભરી સ્થિતિ ન સર્જાય તે માટે હાઇકોર્ટ પાસેથી જરૂરી નિર્દેશની માંગ કરી હતી. હાઇકોર્ટે રાજ્ય સરકારના આ મુદ્દે 25મી જૂન સુધીમાં રિપોર્ટ રજૂ કરવાનો હુકમ કર્યો હતો.

અરજદારના વકીલ હિરક ગાંગુલીએ જણાવ્યું કે, સુપ્રીમ કોર્ટના આદેશ પ્રમાણે ગટર કે ટાંકા સાફ કરતા કર્મચારીઓની પરિસ્થિતિ સમજવા માટે કમિટીની રચના કરવાની જરૂર હતી. પરંતુ આજ દિવસ સુધી મોનીટરીંગ કે સર્વે કર્યો નથી. છેલ્લા 6 વર્ષમાં ગટર કે ટાંકા સાફ કરતી વખતે મૃત્યુ પામ્યા છે તેની પણ કોઈ માહિતી રજૂ કરવામાં આવી ન હોવાનો આક્ષેપ કરવામાં આવ્યો હતો.

તાજેતરમાં જ ડભોઈમાં ગટર સાફ કરવા માટે ઉતરેલા 7 લોકોના મોત નિપજ્યા હતા. તેમને વળતર પણ ચુકવવામાં આવ્યું નથી.