અમદાવાદ: ભાજપ પ્રદેશ પ્રવક્તા ભરત પંડ્યાએ જણાવ્યું હતું કે, વડાપ્રધાન નરેન્દ્ર મોદીના સંબોધનમાં મોટીવેશન, વિઝન, એક્શનનું પ્રતિબિંબ જોવા મળે છે. તેમણે “આત્મનિર્ભર ભારત”નો નવો સંકલ્પ દેશવાસીઓ સમક્ષ મુક્યો છે. જેમાં પાંચ બાબતોને પ્રાધાન્ય આપવાનું કહ્યું છે. ઈકોનોમી, ઈન્ફ્રાસ્ટ્રકચર, સીસ્ટમ, ડેમોગ્રાફી, ડીમાન્ડ વધારવા અને તેને પૂરી કરવા પર ભાર મુક્યો છે. આ સાથે જ સપ્લાય ચેઈન વધુ મજબૂત અને આધુનિક બનાવવાનું કહ્યું છે. ભારતના દરેક ક્ષેત્ર, દરેક વર્ગ માટે રુપિયા 20 લાખ કરોડના ઐતિહાસિક પેકેજની જાહેરાત કરીને દેશવાસીઓને આત્મબળ, આત્મવિશ્વાસપૂર્વક આગળ વધવાની તેમજ સહયોગ આપવાની અપીલ કરી છે. આ ભવ્ય પેકેજને ભાજપ આવકારે છે.
વડાપ્રધાન નરેન્દ્ર મોદીએ જાહેર કરેલા આર્થિક પેકેજ અંગે ભરત પંડ્યા અને જીતુ વાઘાણીએ આપી પ્રતિક્રિયા તો બીજી તરફ ભાજપા પ્રદેશ અધ્યક્ષ જીતુભાઈ વાઘાણીએ પણ વડાપ્રધાન નરેન્દ્રભાઈ મોદી દ્વારા વૈશ્વિક મહામારી કોરોના વાઇરસના કારણે દેશમાં પ્રવર્તમાન પરિસ્થિતિને પહોંચી વળવા જાહેર કરાયેલા કુલ રૂપિયા 20 લાખ કરોડના વિશેષ આર્થિક પેકેજને આવકારી જણાવ્યું હતું કે, દેશના જીડીપીના 10 ટકા જેટલું આ વિશાળ આર્થિક પેકેજ દેશના ખેડૂતો, મજૂરો, મધ્યમ વર્ગ, મોટા તેમજ લઘુ ઉદ્યોગકારો, MSME સેક્ટર સહિત દેશના તમામ વર્ગો માટે આશીર્વાદરૂપ સાબિત થશે.
વડાપ્રધાન નરેન્દ્ર મોદી દેશના 130 કરોડ નાગરિકોના સહયોગથી ભારતને આત્મનિર્ભર બનાવવા માટે એડી ચોટીનું જોર લગાવી રહ્યા છે. આ તકને ભારતવાસીઓએ ઝીલી લેવી જોઇએ. લોકલ માટે વોકલ બનીએ. એટલે કે સ્વદેશી પેદાશો માટે વધુ પ્રચાર-પ્રસાર કરીએ. તેમજ લોકડાઉન-૪ની જાહેરાત સાથે નિયમોનું પાલન કરીને કોરોના સાથે જીવન જીવતા શીખીએ તેમ ભાજપ પ્રવક્તા ભરત પંડ્યાએ જણાવ્યું હતું.
