ભાજપ પ્રવક્તા ભરત પંડ્યાએ કર્યો ઇમરાન ખેડાવાલા પર બેદરકારીનો આક્ષેપ

ભાજપ પ્રદેશ પ્રવક્તા ભરત પંડયાએ જણાવ્યું હતું કે, કોંગ્રેસના ધારાસભ્ય ઈમરાન ખેડાવાલાનો કોરોના રિપોર્ટ પોઝિટિવ આવ્યો છે. તે બાબત ચિંતાજનક છે અને સહાનુભૂતિને પાત્ર છે.

અમદાવાદઃ ભરત પંડ્યાએ ઇમરાન ખેડાવાલા પર નિશાન સાધતા જણાવ્યું હતું કે, જયારે પોતે બિમાર હોય, કોરોના માટે ટેસ્ટ કરાવ્યો હોય અને માસ્ક નીચે રાખીને લોકોની વચ્ચે ફરવુંએ ગંભીર બેદરકારી જ ગણાય. ઈમરાનના પરિવારનું શું ? તેમનાં પાડોશીનું શું? તેઓ જેને જેને મળ્યાં હશે તેમનું શું? જે મીડિયાના મિત્રો કોરોના સામેની લડાઈમાં જનજાગૃતિ કરવાનું મહત્વનું કામ કરે છે, તેમને મળ્યાં હશે, તે મીડિયાના મિત્રો અને તેમના પરિવારનું શું? જે મુખ્યપ્રધાને અમદાવાદના કોટ વિસ્તારની ચિંતા કરીને મળવા બોલાવ્યા તેવા ગુજરાતના મુખ્ય પ્રધાન, નાયબ મુખ્ય પ્રધાન, ગૃહ પ્રધાન, જેઓ ગુજરાતની 6 કરોડ જનતાની ચિંતા કરીને રાત-દિવસ કામ કરે છે. તેમનું શું?

કોઈપણ વ્યક્તિ પોતે જો બિમાર હોય, કોરોના ટેસ્ટ કરાવ્યો હોય, એટલે કે શંકાસ્પદ કોરોના વખતે લોકોની વચ્ચે જઈને “સેવા" કરવીએ “કુસેવા “છે. અને તે કહેવાતી સેવાએ માનવજાત માટે “જોખમ” છે. આ વાત સહુએ યાદ રાખવી પડશે.