અસ્લામ 25-30 હજાર માટે કરતો હતો હત્યા, 10 વર્ષ બાદ ATSના હાથે લાગ્યો

ગુજરાત ATSએ 10 વર્ષ જૂના અને 5 જેટલી હત્યાને અંજામ આપી ચુકેલા આરોપીને સુરતથી ઝડપી પાડ્યો છે. આરોપી 25-30 હજાર રૂપિયા માટે ટ્રેકટર ચાલક અને કંડક્ટરને ઢોર મારમારી હત્યા કરી હાથ-પગ બાંધી નદીમાં ફેંકી દેતો હતો.

ગુજરાત ATSને મળી મોટી સફળતા

• 5 હત્યાનો આરોપી અસ્લામ 10 વર્ષથી નાસતો ફરતો હતો
• ATSના હાથે 10 વર્ષ બાદ લાગ્યો અસ્લામ
• 25-30 હજાર માટે કરતો હતો હત્યા

અમદાવાદઃ વર્ષ 2008થી 2011 દરમિયાન અસ્લામ ઉર્ફે લાલાએ પોતાના સાગરીતો સાથે મધ્ય ગુજરાતમાં રાત્રીના સમયે રેતી-કપચીના ફેરા મારતા હોય અને એક-બે વ્યક્તિ કામ કરતા હોય તેવુ ટ્રેકટર રોકી વ્યક્તિને મારતા અને તેના હાથ પગ બાંધી નદી કેનાલમાં ફેંકી દેતા અને ટ્રેકટર તથા ટ્રોલીને નજીવી કિંમતમાં વેચી દેતા હતા.

મધ્ય ગુજરાતમાં અસ્લામ અને તેના સાગરીતો સાથે મળી કરવામાં આવેલ હત્યામાં કોઠબા ગામમાં 2, દહેગામ, શામળાજી, છોટા ઉદેપુરમાં 1-1 એમ કુલ 5 વ્યક્તિઓને અલગ-અલગ જગ્યાએ હાથ-પગ બાંધી કેનાલમાં ફેંકીને હત્યા કરી હતી. અસ્લામેં તેના સાગરીતો સાથે મળીને કુલ 10 ટ્રેકટર, 12 ટ્રોલી તથા એક મોટર સાયકલની ચોરી-લૂંટ કરી હતી. જ્યારે અન્ય જગ્યાએ ડ્રાઈવરને માર મારી લૂંટ કરી હતી અને આર્મ્સના ગુનામાં પણ સંડોવાયેલા છે.

આરોપી અસ્લામ સુખી કુટુંબમાંથી આવે છે. બાલાસિનોર દેવચોકડી પર તેના પિતાને પેટ્રોલ પમ્પ પાસે ફાર્માટ્રેક ટ્રેકટરની એજન્સી હતી. અસ્લામ 30 હજારની રકમની લૂટ માટે ખૂન કરતા પણ અચકાતો નથી. અસ્લામ 12માં ધોરણ સુધીનો અભ્યાસ કરી ચુક્યો છે. અસ્લામને ખરાબ સંગત હોવાથી ગુનાહિત પ્રવૃત્તિમાં જોડાયો હતો.

જે તે સમયે શામળાજી હાઇવે પર મોડાસા પાસે ટ્રેકટર ડ્રાઇવરના ખુનના ગુનામાં સહ આરોપી પકડાઈ જતા અસ્લામ પકડાઈ જવાની બીકે અજમેર ભાગી ગયો હતો. જે બાદ ગોવા, સુરત રેલ્વે સ્ટેશન ગયો હતો. કન્સ્ટ્રક્શન કંપનીમાં લાલભાઈ કમલેશભાઈ પટેલ એવા ખોટા નામની ઓળખ આપી લેબર વર્કરની નોકરી કરતો હતો. આરોપી છેલ્લા દોઢ વર્ષથી રાંદેર રોડ ખાતે આવેલ શેલબી હોસ્પિટલમાં ઓટી સ્ટાફ તરીકે નોકરી કરતો હતો.

અસ્લામ સુરતની આશુતોષ હોસ્પિટલમાં નોકરી કરતો હતો, ત્યારે નર્સ તરીકે ફરજ બજાવતી યુવતીને લાલભાઈ પટેલ નામની ઓળખ આપી પ્રેમ લગ્ન કર્યા હતા અને લગ્નથી 3 બાળકો પણ છે. યુવતીને હજુ સુધી ખબર નથી કે તેનો પતિ મુસ્લિમ છે અને હત્યારો છે.

ATSએ ત્રણ માસના ટેક્નિકલ વર્કઆઉટના આધારે ખોટી ઓળખ ઉભી કરીને રહેતા અસ્લામને સુરત ખાતેથી ઝડપી પાડ્યો છે. આરોપીને પોલીસ સ્ટેશનમાં સોંપી આગળની કાર્યવાહી હાથ ધરવામાં આવી છે.