સોનીની ચાલી પાસે વતન જવા પરપ્રાંતીયોનું ટોળું ભેગું થતાં પોલીસે સમજાવીને પરત મોકલ્યાં

લૉક ડાઉન 3.0માં પરપ્રાંતીયોની મોટી સંખ્યા ગુજરાતના મોટા આર્થિક નગરોના પ્રશાસન માટે વિકટ સમસ્યારુપ બની રહી છે. પરપ્રાંતીયોના હજારોની સંખ્યામાં ઉમટી પડતાં ટોળેટોળાંને સંભાળવા પોલિસ દ્વારા સમજાવટ હાથ ધરવામાં આવે છે. અમદાવાદના પૂર્વ વિસ્તારમાં સોનીની ચાલી વિસ્તારમાં આમ બનતાં અહીંપણ પોલિસે શ્રમિકોને સમજાવીને પરત મોકલ્યાં હતાં.

અમદાવાદ: લૉક ડાઉનની સૌથી વધુ અસર પરપ્રાંતીય લોકો પર જોવા મળી રહી છે. કોરોના વાઇરસની દહેશત દેશ અને સમગ્ર રાજ્યોમાં જોવા મળી રહી છે. તેવામાં અમદાવાદના ઓઢવ વિસ્તારમાં આવેલ સોનીની ચાલી વિસ્તાર પાસે મોટી સંખ્યામાં પરપ્રાંતીય લોકો ભેગા થયાં હતાં. વતન પાછા જવાની આશા સાથે મોટી સંખ્યામાં ભેગા તો થયાં પરંતુ તરત પોલીસ દ્વારા ઘટનાસ્થળે હાલ તમામને સમજાવી પરત મોકલવવામાં આવ્યાં છે.

કોરોના વાઇરસના કેસોમાં સતત વધારો જોવા મળી રહ્યો છે. તેવામાં પરપ્રાંતીય લોકોમાં સૌથી વધુ મુશ્કેલીઓ જોવા મળી રહી છે. રહેવા અને ખાવાપીવા માટે રૂપિયા પણ નથી જેને લઈ હવે તેઓને પોતાના વતન જવું છે. પરંતુ ગુજરાત સરકાર અને બિહાર સરકાર દ્વારા યોગ્ય વ્યવસ્થા ઉભી કરવામાં આવતી નથી જેને લઈ સૌથી વધુ આક્રોશ જોવા મળી રહ્યો છે. તેમની માગ છે કે સરકાર યોગ્ય વ્યવસ્થા ઉભી કરે અને તેઓને પોતાના વતન પાછા મોકલી આપે ત્યારે સરકાર ક્યારે તેઓની વ્હારે આવે છે તે તો જોવું રહ્યું.આશરે 2 હજારથી વધુ શ્રમિકો સોનીની ચાલી પાસે ભેગા થયાં હતાં. વતન જવાની માગ સાથે ભેગાં થયેલાં લોકોને હાલ તો પોલીસે સમજાવીને પરત મોકલ્યાં છે. હવે ગુજરાત સરકાર દ્વારા યોગ્ય વ્યવસ્થા ઉભી થાય છે કે નહીં તે એક મોટો સવાલ છે.