અમદાવાદની વટવા પોલીસે ઘરફોડ ચોરી કરતી ગેંગ ઝડપી, 42 મોબાઈલ કર્યા જપ્ત

અમદાવાદઃ શહેરની વટવા પોલીસે ઘરફોડ કરતી ગેંગને ઝડપી છે. અમદાવાદમાં ઘરફોડ ચોરીનો ભારે આતંક છવાયેલો હતો. ચોક્કસ બાતમીને આધારે અને વિવિધ પોલીસ સ્ટેશનમાં નોંધાયેલી ફરિયાદને આધારે વટવા પોલીસે ત્રણ આરોપીની ઘરપકડ કરી છે. જે તમામની તપાસ કરતા તેની પાસેથી 42 મોબાઈલ ફોન અને સેવરોલેટ સ્પાર્ક કાર જપ્ત કરી છે.

અમદાવાદ પોલીસે અમદાવાદમાં વધતાં ચોરીઓના બનાવોને અટકાવવા અને ગુનાઓનો ભેદ ઉકેલવા માટે સર્વેલન્સ સ્કવૉર્ડ બનાવી હતી. પોલીસ કર્મચારીઓની જુદી-જુદી ટીમો બનાવી વટવા પોલીસ સ્ટેશન, કાગડાપીઠ પોલીસ સ્ટેશન અને ઈસનપુર પોલીસ સ્ટેશનના હદ વિસ્તારમાંથી CCTV ફૂટેજના આધારે ચોરીમાં વપરાતી ફોરવ્હીલ કારની ઓળખ કરી હતી. તપાસ કરતાં કાર સુરત શહેરમાં રજિસ્ટર થયેલી હોવાનું બહાર આવ્યું હતું.

આ કારની તપાસ હાથ ધરતાં આ કાર સેવરોલેટ સ્પાર્ક સુરતથી અમદાવાદ ટ્રાન્સફર થઈ હોવાનું, તેમજ કાર ખરીદનાર ગુનાહિત વ્યક્તિ હોવાની માહિતી મળી. જેના આધારે પોલીસ ઘરફોડીયા સુધી પહોંચી હતી.

આમ, પોલીસ ઈન્સપેક્ટર ડી. આર. ગોહિલના સતત મોનિટરીંગથી હ્યુમન સોર્સ તથા ટેકનિકલ સોર્સના ઉપયોગથી GIDC વટવા, એસ. પી. રિંગ રોડ, સરસ્વતી ચાર રસ્તા પાસેથી મળેલી બાતમીના આધારે સેવરોલેટ સ્પાર્ક કાર નંબર જીજે-05-સીઈ-2567 તથા ચોરેલાં 42 મોબાઈલ ફોન સાથે 3 આરોપીને ઝડપ્યાં હતાં.

આ ઘટનામાં વધુ લોકો સંકળાયેલાં હોવાની પોલીસને શંકા છે. જેથી વટવા પોલીસે ચોરીનો ગુનો નોંધી આગળની વધુ તપાસ હાથ ધરી છે.