Ahmedabad Crime : પૂર્વ IPSના પુત્રએ કારનો લાખોમાં સોદો કર્યા બાદ રોફ જમાવી કાર કે પૈસા પરત ન આપતા નોંધાયો ગુનો

અમદાવાદમાં નિવૃત IPSના પુત્રએ કારનો સોદો કરીને કાર કે પૈસા ન આપતા ફરીયાદ નોંધાઇ છે. નિવૃત્ત IPS ના પુત્ર એ 10.25 લાખમાં સોદો કરીને ધીરે ધીરે 4.23 લાખ મેળવી લીધા હતા. બાદમાં ફરિયાદીએ કાર માંગતા નિવૃત્ત IPSના પુત્રએ રોફ મારી ધમકી આપતા પોલીસ સ્ટેશનમાં અરજી નોંધાઈ છે.

અમદાવાદ : નિવૃત્ત IPS બાવકુભાઇ જેબલિયાના પુત્ર સામે સોલા પોલીસે આખરે એક ફરિયાદ નોંધી તપાસ શરૂ કરી છે. આરોપી નિરવ જેબલિયાએ ગાડી વેચવાનું કહી લાખો રૂપિયા પડાવી નાણાં કે ગાડી ન આપી છેતરપિંડી વિશ્વાસઘાત કરતા સોલા પોલીસે અરજી લીધી હતી. બાદમાં અરજીના કામે હવે ફરિયાદ નોંધી તપાસ હાથ ધરી છે.

શું છે સમગ્ર મામલો : થલતેજમાં રહેતા વિજય મિશ્રા કાર લે વેચનું કામ કરે છે. ગત તારીખ 26 એપ્રિલ 2023માં હાઇકોર્ટમાં ડ્રાઇવર તરીકે નોકરી કરતા કિરણ બારોટ પણ વકીલોને ગાડી લે વેચ કરતા હોવાથી વિજયભાઇને તેમનો ફોન આવ્યો હતો. કીરણભાઇએ આ વિજયભાઇને જણાવ્યું કે, તેમના મિત્ર નિરવ બાવકુભાઇ જેબલિયાને ગાડી વેચવાની છે. જેથી વિજયભાઇ ગાડી લેનારને સાથે રાખી હાઇકોર્ટ ગયા હતા. ત્યાં નિરવ જેબલિયા આવ્યો અને તેણે ગાડી બતાવી હતી. બાદમાં નિરવ જેબલિયા સાથે 10.25 લાખમાં સોદો થયો હતો. નિરવે બે લાખ ટોકન પણ માંગ્યા હતા. જોકે તે સમયે 50 હજાર હોવાથી તે 50 હજાર ટોકન પેટે આપી તેઓ ડીલ કરી રવાના થયા હતા અને બાદમાં બીજા દોઢ લાખ આપ્યા હતા.

ધમકીઓ આપવાની ચાલુ કરી : બાદમાં તારીખ 30મી એપ્રિલ 2023ના રોજ નિરવે લોન ભરવી છે, તેમ કહી કિરણ બારોટ પાસેથી દોઢ લાખ લીધા હતા. થોડા દિવસ બાદ હપ્તો ભરવાનું કહી 73 હજાર લીધા હતા. જ્યારે ગાડી ખરીદનારે ગાડી માંગતા નિરવ જેબલિયાએ ધમકીઓ આપવાનું શરૂ કર્યું હતું. નિરવે ગાડી કે 4.23 લાખ નહીં મળે તેવો રોફ મારી ધમકીઓ આપતા આખરે સોલા પોલીસ સ્ટેશનમાં અરજી નોંધાવાઇ હતી. જે અરજી આધારે આખરે સોલા પોલીસે નિવૃત્ત IPSના પુત્ર નિરવ જેબલિયા સામે ગુનો નોંધી તપાસ હાથ ધરી છે.

આ અંગે અરજીના આધારે ગુનો દાખલ કરવામાં આવ્યો છે અને વધુ તપાસ હાથ ધરવામાં આવી છે. - જી.એસ શ્યાન (ACP, એ ડિવીઝન)