6 શહેરમાં લોકડાઉનની અફવા ફેલાવનારો શખ્સ ડભોઈથી ઝડપાયો

રાજ્યમાં કોરોના સંક્રમણ વધી રહ્યુ છે, ત્યારે 6 મોટા શહેરમાં લોકડાઉન લગાવવામાં આવશે તેવી એક શખ્સે અફવા ફેલાવી હતી. જેથી સાઇબર ક્રાઇમની ટીમે  આ અફવા ફેલાવનારા શખ્સને ઝડપી પાડ્યો છે. ડભોઇથી જાવેદ અહેમદ ખત્રીને પોલીસે ઝડપી પાડ્યો છે. ફેસબુક પોસ્ટમાં લોકડાઉનના મેસેજની પોસ્ટ કરી હતી, જે ગણતરીના સમયમાં જ વાયરલ થઈ ગઇ હતી. તે બાદ સરકાર એક્શનમાં આવી હતી અને સાઇબર સેલને આ મામલે તપાસ સોપવામાં આવી હતી. સાઇબર ક્રાઇમની ટીમે ગણતરીના સમયમાં જ આ ખોટી પોસ્ટ કરનારા વ્યક્તિને ઝડપી પાડ્યો હતો.

• 6 શહેરોમાં લોકડાઉન અંગેની ફેલાઈ હતી અફવા
• સાયબર ક્રાઇમે ગુનો નોંધી તપાસ કરતા એકની કરી ધરપકડ
• ડભોઇથી જાવેદ અહેમદ ખત્રીને પોલીસે ઝડપી પાડ્યો

અમદાવાદઃ રાજ્યમાં કોરોના કેસમાં વધારો થતા 6 મોટા શહેરોમાં લોકડાઉન લગાવવામાં આવશે તેવી અફવા ફેલાવનારા શખ્સને સાઇબર ક્રાઇમની ટીમે ઝડપી પાડ્યો છે. અફવા ફેલાવનારા જાવેદ અહેમદ ખત્રીને ડભોઈથી પોલીસે ઝડપી પાડ્યો છે.

રાજ્ય સરકારના ગૃહવિભાગના પ્રવક્તાએ કરી સ્પષ્ટતા

આ અંગે રાજ્ય સરકારના ગૃહવિભાગના પ્રવક્તાએ સ્પષ્ટતા કરતા જણાવ્યું હતું કે, ગુજરાતના 6 મોટા શહેરો અમદાવાદ, વડોદરા, રાજકોટ, સુરત, ભાવનગર તથા ગાંધીનગરમાં તારીખ 11 એપ્રિલથી તારીખ 17મી એપ્રિલ સુધી રાજ્ય સરકારે સંપૂર્ણ લોકડાઉનનો નિર્ણય કર્યો છે, આ લોકડાઉન દરમિયાન માત્ર આપત્તકાલિન સેવા જ શરૂ રહેશે તથા શહેરમાં પ્રવેશ અને નિષેધ માટે જિલ્લા મેજીસ્ટ્રેટની પરવાનગી લેવી જરૂરી રહેશે એવો આ પત્રમાં ઉલ્લેખ છે જે બિલકુલ અસત્ય અને ખોટો છે. ગૃહ વિભાગના અધિક મુખ્ય સચિવ પંકજકુમારના નામજોગ અને ખોટી સહી સાથેનો આ પત્ર તદ્દન ખોટો અને ફેક છે.

આ પણ વાંચોઃ લોકડાઉનની અફવાના કારણે લોકોની ભાગમભાગ, વતન જવા ધસારો

વાયરલ થયો હતો પત્ર

ગુજરાતના 6 મોટા શહેરોમાં 11 એપ્રિલથી 17 એપ્રિલ સુધી સંપૂર્ણ લોકડાઉનનો નિર્ણય કરવામાં આવ્યો હોવા અંગેના આપાતકાલીન નોંધ સ્વરૂપે સોશિયલ મીડિયામાં ફરતો થયેલો પત્ર તદ્દન ફેક અને ખોટો હોવાનું રાજયના ગૃહ વિભાગ તરફથી સ્પષ્ટતા કરવામાં આવી હતી. આ પત્રથી ગુજરાતના નાગરિકોએ ગેરમાર્ગે નહીં દોરવા અનુરોધ કર્યો હતો તેની સાથે આ પત્રમાં કોઇ જ સત્યતા ન હોવાનું જણાવ્યુ હતું.

આ પણ વાંચોઃ વડોદરામાં લોકડાઉનની અફવાએ જોર પકડ્યું, બજારમાં લોકોની ભીડ ઉમટી

ગૃહવિભાગના અધિક મુખ્ય સચિવની બનાવટી સહી કરી હતી

આ પત્રમાં ગૃહ વિભાગના અધિક મુખ્ય સચિવ પંકજકુમારની બનાવટી સહી હતી. તેઓનો 7 એપ્રિલથી કોરોના રિપોર્ટ પોઝિટિવ આવ્યો હોવાથી તેઓ હાલ યુ.એન. મહેતા હાર્ટ હોસ્પિટલમાં સારવાર હેઠળ છે અને તેઓ રજા પર હોવાથી તેમના વિભાગોના ચાર્જ પણ ત્રણ જુદા જુદા IAS અધિકારીઓને સોંપવામાં આવ્યાં છે.