બળવાખોર ધારાસભ્ય અલ્પેશ ઠાકોરે કોંગ્રેસના હોદ્દા પરથી રાજીનામું આપી દીધું હતું. જોકે રાધનપુર બેઠકથી ધારાસભ્ય પદ ચાલું રાખતા કોંગ્રેસ દ્વારા વિરોધ કરવામાં આવ્યો હતો. ધારાસભ્ય તરીકે ગેરલાયક ગણવા માટે વિધાનસભાના સ્પીકર રાજેન્દ્ર ત્રિવેદીને રજૂઆત કરી હતી. જો કે દોઢ મહિના જેટલો સમય વીતી જતા હાઇકોર્ટમાં રિટ દાખલ કરવાની ફરજ પડી હતી.
અલ્પેશ ઠાકોરનાં ધારાસભ્ય પદ રદ કરવા બાબતે હાઇકોર્ટે વિધાનસભાના સ્પીકરને નોટિસ પાઠવી ખુલાસો માંગ્યો - AHD
અમદાવાદઃ કોંગ્રેસમાંથી રાજીનામુ આપનારા ધારાસભ્ય અલ્પેશ ઠાકોરનું ધારાસભ્ય પદ રદ કરવા કોંગ્રેસ દ્વારા આશરે દોઢ મહિના પહેલા વિધાનસભાના સ્પીકરને રજૂઆત કરવામાં આવી હતી. જો કે કોઈ નિવેડો ન આવતા કોંગ્રેસી નેતા અશ્વિન કોટવાલે સોમવારે હાઇકોર્ટમાં રિટ દાખલ કરતા જસ્ટિસ એસ.આર.બ્રહ્મભટ્ટ અને એ.પી. ઠાકરની ખંડપીઠે આ મુદ્દે વિધાનસભાના સ્પીકર અને અલ્પેશ ઠાકોરને નોટિસ પાઠવી ખુલાસો માંગ્યો છે. આ મામલે વધુ સુનાવણી 27મી જૂનના રોજ હાથ ધરવામાં આવશે.
Alpesh Thakor
કોંગ્રેસે દોઢ મહિના પહેલા સ્પીકર રાજેન્દ્ર ત્રિવેદીને ધારાસભ્ય રદ કરવા અરજી કરી હતી. જે મુદ્દે સ્પીકરે અલ્પેશ ઠાકોરને નોટિસ પણ પાઠવી હતી. એ વાત અલગ છે કે આ મુદ્દે કોઈ પ્રક્રિયા થઈ નહોતી. વિધાનસભામાં વિરોધપક્ષના દંડક અશ્વિન કોટવાલે આક્ષેપ કર્યો હતો કે, બંધારણીય રીતે કોઈ નિર્ણય ન લેવાયો હોવાથી હાઇકોર્ટમાં રિટ કરી છે.
અલ્પેશ ઠાકોર આગામી 29 અને 30મી જૂને ઠાકોર સેનાની ઔપચારિક બેઠકનું આયોજન કરશે. ચોમાસા સત્ર પછી ભાજપનો કેસરી ખેસ પહેરે તેવી શક્યતા વ્યક્ત કરવામાં આવી રહી છે. અલ્પેશ ઠાકોરની સાથે બાયડના ધારાસભ્ય ધવલસિંહ ઝાલા અને બહુચરજીના ધારાસભ્ય ભરતજી ઠાકોર ભાજપમાં જોડાય તેવી શક્યતા પણ વ્યક્ત કરાઈ રહી છે .