19 દિવસમાં 18 લાખ કરોડ રૂપિયા ખંખેરી લેવાયાંઃ અર્જુન મોઢવાડીયા

ગુજરાત સહિત સમગ્ર દેશમાં મોંઘવારી વચ્ચે સરકારે પેટ્રોલ-ડિઝલમાં સતત 19ના દિવસે ભાવવધારો ઝીંકીને લોકોની કમર તોડી નાખી છે ત્યારે વિરોધ પક્ષ પેટ્રોલ-ડીઝલના ભાવ મુદ્દે આક્રમણ વચ્ચે ધરણાં અને આંદોલનના મૂડમાં ફેરવાઈ રહ્યું છે. વિરોધ પક્ષે ગુજરાતના અનેક મોટા જિલ્લાઓમાં વિરોધ પ્રદર્શન કર્યાં છે અમદાવાદમાં કોંગ્રેસના અનેક નેતાઓ પણ સરકાર સામે બાંયો ચઢાવી દીધી છે ત્યારે અમદાવાદમાં કોંગ્રેસના નેતા અર્જુન મોઢવાડીયાએ આ મુદ્દે સૌથી મોટું નિવેદન આપ્યું છે

અમદાવાદઃ કોંગ્રેસના નેતા અર્જુન મોઢવાડીયાનું પેટ્રોલ-ડીઝલના ભાવ વધારા મુદ્દે એક નિવેદન સામે આવી રહ્યું છે. અર્જુન મોઢવાડીયાએ જણાવ્યું કે પહેલીવાર એવું બન્યું છે કે આઝાદી પછી આપણે ત્યાં પેટ્રોલે ડીઝલને પછાડ્યું છે. આ સિલસિલો છેલ્લાં 19 દિવસમાં સરકારી ભાવ વધારો કરીને પ્રજા પાસેથી કુલ 18 લાખ કરોડ રૂપિયા ખંખેરી લીધા છે આજે ૪૦ ડોલરે એક બેરલ મળે છે તો પેટ્રોલ-ડીઝલના ભાવ વધારા કેમ ઝીંકવામાં આવે છે. મારા સવાલો સત્તામાં બેઠેલાં લોકોને છે કે પહેલાં ભાવ વધારા થાય ત્યારે દેખાવ કરનારા આજે કેમ ચૂપ છે. તેમણે ઉમેર્યું હતું કે અમારી માગ છે કે કોંગ્રેસના સમયમાં પેટ્રોલ-ડીઝલમાં જે ભાવ હતો તે ભાવ આજે કરો. યુ.પી.એ સરકારની નીતિ પ્રમાણે આજે 40 રૂપિયા પેટ્રોલ મળે તેમ છે.

19 દિવસમાં 18 લાખ કરોડ રૂપિયા ખંખેરી લેવાયાંઃ અર્જુન મોઢવાડીયા

ઉલ્લેખનીય છે કે વૈશ્વિક સ્તરે કાચા તેલના ભાવમાં ઘટાડો હોવા છતાં ઘરેલુ બજારમાં ડીઝલના ભાવમાં સતત વધારો થઈ રહ્યો છે. છેલ્લાં કેટલાય દિવસોથી પેટ્રોલ અને ડીઝલના ભાવ વધી રહ્યાં છે. 19માં દિવસે ડીઝલમાં 14 પૈસા જ્યારે પેટ્રોલમાં 16 પૈસાનો વધારો ઝીંકવામાં આવ્યો છે. જ્યારે છેલ્લાં 19 દિવસની વાત કરીએ તો ડીઝલની કિંમત કુલ 10.66 રૂપિયા પ્રતિ લીટર પહોંચી છે. જ્યારે પેટ્રોલ 8.66 રૂપિયા પ્રતિ લીટરનો વધારો નોંધાયો છે. ગુરુવારે એટલે કે આજે સરકારી તેલ કંપનીઓએ ફ્યુલ ની કિંમતમાં વધારો કર્યો છે. દિલ્હીમાં પેટ્રોલના ભાવ 16 પૈસા વધીને 79.76 રૂપિયા પ્રતિ લીટરે પહોંચ્યા છે. જ્યારે ડીઝલમાં 14 પૈસાનો વધારો થતાં ભાવ 80.02 રૂપિયા પ્રતિ લિટરે બોલાઇ રહ્યા છે. આ સાથે દેશના ઇતિહાસમાં પહેલીવાર ડીઝલના ભાવ ૮૦ રૂપિયા પહોંચ્યાં છે. દિલ્હી શું આખા દેશમાં આવું પહેલીવાર થયું છે કે ડીઝલના ભાવ 80 રૂપિયાને પાર પહોંચ્યાં હોય.

જોકે અર્જુન મોઢવાડીયાની માગ હતી કે પેટ્રોલ-ડીઝલના ભાવમાં સતત વધારો થઈ રહ્યો છે જેની સામે સરકારે કોઈ નક્કર પગલાં લેવા જોઈએ અને મોંઘવારીનો માર જે આમ લોકો પર પડી રહ્યો છે તે ઓછો કરવો જોઈએ.