નવી દિલ્હીઃ ભારતને ઓસ્ટ્રેલિયા દ્વારા ત્રણ ODIની છેલ્લી મેચમાં 66 રને પરાજય મળ્યો છે. આ મેચમાં ઓસ્ટ્રેલિયાએ પ્રથમ બેટિંગ કરતા 50 ઓવરમાં 7 વિકેટ ગુમાવીને 352 રન બનાવ્યા હતા. આ ટાર્ગેટનો પીછો કરતા ટીમ ઈન્ડિયા 49.4 ઓવરમાં 286 રનમાં સમેટાઈ ગઈ હતી. આ સાથે ઓસ્ટ્રેલિયાએ 3 વનડે શ્રેણીની છેલ્લી મેચ 2-1થી જીતી લીધી છે.
ઓસ્ટ્રેલિયા: આ મેચમાં ઓસ્ટ્રેલિયા તરફથી ડેવિડ વોર્નરે 56 રન, મિચેલ માર્શે 96 રન, સ્ટીવ સ્મિથે 74 રન અને માર્નસ લાબુશેને 72 રનની અડધી સદી ફટકારી હતી. ભારત તરફથી જસપ્રીત બુમરાહે સૌથી વધુ 3 વિકેટ લીધી હતી. તો કુલદીપ યાદવે પણ 2 વિકેટ પોતાના નામે કરી હતી.
ભારત: રોહિત શર્મા અને વિરાટ કોહલીએ આ મેચમાં શાનદાર બેટિંગ કરી હતી. આ બંનેએ ઓસ્ટ્રેલિયન બોલરોને ખરાબ રીતે માત આપી હતી. ટીમ ઈન્ડિયા તરફથી રોહિત શર્માએ 81 રન અને વિરાટ કોહલીએ 56 રન બનાવ્યા હતા. આ બંને સિવાય રવિન્દ્ર જાડેજાએ 35 રનની ઇનિંગ રમી હતી. ઓસ્ટ્રેલિયા તરફથી ગ્લેન મેક્સવેલે 4 અને જોશ હેઝલવુડે 2 વિકેટ ઝડપી હતી.