નવી દિલ્હી: ટીમ ઈન્ડિયાના ચીફ સિલેક્ટર ચેતન શર્માના નિવેદનના કારણે BCCIમાં હલચલ તેજ થઈ ગઈ છે. ચેતન શર્મા ટીમ ઈન્ડિયાના ખેલાડીઓ પર ટિપ્પણી કરીને વિવાદોમાં ફસાઈ ગયા છે. તેણે ટીમના સ્ટાર બેટ્સમેન વિરાટ કોહલી, કેપ્ટન રોહિત શર્મા અને ભારતીય ટીમના મુખ્ય કોચ રાહુલ દ્રવિડ પર ઘણા ગંભીર આરોપ લગાવ્યા છે. આ પછી ટીમ ઈન્ડિયાના ખેલાડીઓની પસંદગી પર આવા ઘણા ખુલાસા થયા છે, જેના પછી ભારતીય ક્રિકેટ કંટ્રોલ બોર્ડ અને ટીમ ઈન્ડિયા પર પણ સવાલો ઉભા થશે.
ચેતન શર્માએ વિરાટ કોહલી પર સૌથી મોટો આરોપ લગાવ્યો છે: ચેતન શર્માએ 'z ન્યૂઝ'ના એક શોમાં આ તમામ બાબતોનો ખુલાસો કર્યો છે. ચેતન શર્માનું કહેવું છે કે વિરાટ કોહલીએ બીસીસીઆઈના પૂર્વ અધ્યક્ષ પર ગંભીર આરોપ લગાવ્યા હતા. કોહલીનું માનવું હતું કે સૌરવ ગાંગુલીએ તેમને જાણ કર્યા વિના જ તેમની પાસેથી ટીમ ઈન્ડિયાની કેપ્ટનશીપ છીનવી લીધી હતી. પરંતુ ચેતન શર્માએ પોતાનું નિવેદન જાહેર કર્યું કે વિરાટ કોહલીને ટીમની કેપ્ટનશીપથી હટાવવાનો નિર્ણય સૌરવ ગાંગુલીનો નહોતો. ચેતન શર્માએ વિરાટ કોહલી અને સૌરવ ગાંગુલી વચ્ચેના વિવાદનું સૌથી મોટું કારણ કોહલીના અહંકારને જણાવ્યું છે. ચેતન શર્માએ કહ્યું કે કોહલીને હંમેશા એવું લાગતું હતું કે સૌરવ ગાંગુલીના કારણે તેને કેપ્ટન્સીથી દૂર કરવામાં આવ્યો છે. પરંતુ કોહલીએ ગાંગુલી પર લગાવેલા તમામ આરોપો ખોટા હતા. ચેતન શર્માએ કોહલીને લઈને વધુ એક મોટો ખુલાસો કર્યો છે. તેણે કહ્યું કે વિરાટ કોહલીએ જાણી જોઈને સૌરવ ગાંગુલી પર ખોટા આરોપો લગાવ્યા હતા, જ્યારે કોહલીને સત્ય ખબર હતી.