નવી દિલ્હીઃભારતમાં ઓક્ટોબર-નવેમ્બર મહિનામાં ODI વર્લ્ડ કપ યોજાવા જઈ રહ્યો છે. આ માટે અલગ-અલગ ખેલાડીઓ દ્વારા અલગ-અલગ ટીમોને જીતના મજબૂત દાવેદાર માનવામાં આવી રહી છે, પરંતુ જો આપણે 2019થી રમાયેલી વન ડેના રેકોર્ડ પર નજર કરીએ તો તેમાં ભારતીય ટીમનો દાવો સૌથી મજબૂત જણાય છે. પરંતુ બાંગ્લાદેશ અને શ્રીલંકાની ટીમનો વિજયના મામલે રેકોર્ડ પણ અન્ય ટીમો કરતા ઘણો સારો છે.
ઇંગ્લેન્ડે 2019નો વર્લ્ડ કપ જીત્યો હતોઃ ભારતીય ક્રિકેટ ટીમ 2019માં ઈંગ્લેન્ડમાં રમાયેલા ODI વર્લ્ડ કપની સેમિફાઈનલમાં પહોંચી હતી, જ્યાં ન્યૂઝીલેન્ડની ટીમે એક રોમાંચક મેચમાં ભારતને 18 રનથી હરાવ્યું હતું. આ સાથે જ બીજી સેમીફાઈનલમાં ઈંગ્લેન્ડની ટીમે ઓસ્ટ્રેલિયાને 8 વિકેટે હરાવી ફાઇનલમાં જગ્યા બનાવી લીધી હતી. આ પછી, ઇંગ્લેન્ડે ફાઇનલમાં ન્યુઝીલેન્ડને હરાવીને આ વર્લ્ડ કપ 2019 જીત્યો હતો.
બાંગ્લાદેશ અને શ્રીલંકાની મજબૂત દાવેદારીઃ આ વખતે ભારતમાં યોજાનાર વર્લ્ડ કપ 2023 માટે ભારત-પાકિસ્તાનની સાથે સાથે ઈંગ્લેન્ડ અને ઓસ્ટ્રેલિયાની ટીમને પ્રબળ દાવેદાર માનવામાં આવી રહી છે, પરંતુ ભારતની પિચ જોતા બાંગ્લાદેશ અને શ્રીલંકાની દાવેદારી મજબૂત છે. જો આ રીતે જોવામાં આવે તો ભારતની ધરતી પર યોજાનાર વર્લ્ડ કપમાં ભારતની સાથે સાથે બાંગ્લાદેશ અને શ્રીલંકાની પણ દાવેદારી મજબૂત થઈ શકે છે.
વેસ્ટ ઈન્ડિઝ જેવી ટીમ પણ ચોથા સ્થાનેઃ આંકડા અનુસાર, 2019 વર્લ્ડ કપ પછી ભારતીય ટીમે સૌથી વધુ વનડે જીતી છે. તે પછી બાંગ્લાદેશ અને શ્રીલંકા જેવી ટીમનો નંબર આવે છે. આટલું જ નહીં, વેસ્ટ ઈન્ડિઝ જેવી ટીમ પણ ચોથા સ્થાને છે, જે આ વર્લ્ડ કપ માટે ક્વોલિફાય થઈ શકી નથી. આ સિવાય ન્યૂઝીલેન્ડ, ઓસ્ટ્રેલિયા, પાકિસ્તાન અને ઈંગ્લેન્ડ જેવી ટીમો જીતના મામલે ઘણી પાછળ છે. દક્ષિણ આફ્રિકાની ટીમ નવમા સ્થાને છે અને માત્ર અફઘાનિસ્તાનની ટીમ તેનાથી નીચે છે.
ટોપ 4 ટીમ કઈ છે?: આ સમયગાળા દરમિયાન, ભારતીય ક્રિકેટ ટીમે કુલ 55 મેચ રમી છે અને 34 મેચ જીતી છે, જ્યારે બાંગ્લાદેશે તેના પછી 27 મેચ જીતી છે. શ્રીલંકાના આંકડા પર નજર કરીએ તો તેણે 26 મેચ જીતી છે, જ્યારે વેસ્ટ ઈન્ડિઝની ટીમ ચોથા સ્થાન પર છે, જેણે કુલ 24 મેચ જીતી છે.
પાકિસ્તાન સાતમા સ્થાનેઃઆ સિવાય ઓસ્ટ્રેલિયાની ટીમ અને ન્યુઝીલેન્ડની ટીમ 21-21 મેચ જીતવામાં સફળ રહી છે. પાકિસ્તાનની ટીમ 19 મેચ જીતીને સાતમા સ્થાને છે જ્યારે ઈંગ્લેન્ડ અને દક્ષિણ આફ્રિકાએ 18-18 મેચ જીતી છે. બીજી તરફ, જો આપણે અફઘાનિસ્તાનની ટીમની વાત કરીએ, તો તેણે માત્ર 14 ODI જીતી છે અને તે 2019 પછી રમાયેલી ODIની સંખ્યામાં સૌથી નીચે છે.
આ પણ વાંચોઃ
- Australia Squad For World Cup 2023: Icc વર્લ્ડ કપ 2023 માટે ઓસ્ટ્રેલિયન ટીમની જાહેરાત, આ સ્ટાર બેટ્સમેનની છુટ્ટી
- India vs West Indies : આજે ભારત માટે કરો યા મરોનો મુકાબલો, સાંજે 8:00 વાગ્યે મેચ શરુ થશે
