અભિનવ કશ્યપના આરોપ પર સલીમખાનની પ્રતિક્રીયા, કહ્યું- હા, આપણે જ બધુ ખોટું કર્યું છે...

દિગ્દર્શક અભિનવ કશ્યપના આરોપ અંગે ફિલ્મ નિર્માતા સલીમ ખાને પ્રતિક્રિયા આપી છે. સુશાંત સિંહ રાજપૂતની આત્મહત્યા બાદ દિગ્દર્શક અભિનવ કશ્યપે લાંબી ફેસબુક પોસ્ટ દ્વારા યશરાજ ફિલ્મ્સ અને સલમાન ખાન પર નિશાન સાધ્યું હતું. સલમાન સાથેની પહેલી 'દબંગ' ફિલ્મનું દિગ્દર્શન કરનાર અભિનવે તાજેતરમાં જ કહ્યું હતું કે અભિનેતા અને તેના ભાઈઓ અરબાઝ અને સોહેલે તેમને હેરાન કર્યા હતા અને તેની ફિલ્મ્સની રિલીઝને પ્રભાવિત કરવાની કોશિશ કરી હતી.

મુંબઇ: 'દબંગ' ડિરેક્ટર અભિનવ સિંહ કશ્યપે ફેસબુક પર નિવેદન લખીને બોલિવૂડ ઇન્ડસ્ટ્રીને ચોંકાવી દીધી છે. અભિનવસિંહે પોતાના નિવેદનમાં સલમાન ખાન પર ઘણા આક્ષેપો કર્યા છે, ત્યારબાદ સલમાન ખાનના પિતા સલીમખાન અને ભાઈ અરબાઝ ખાને પણ આ અંગે પ્રતિક્રિયા આપી છે. અભિનવના નિવેદન બાદ અરબાઝ ખાને તેમના પર કાયદેસરની કાર્યવાહી કરવા જણાવ્યું હતું.

સલમાન ખાનના પિતા સલીમખાને કહ્યું છે કે, તે આ પર પોતાનો સમય બગાડવા માંગતા નથી.

એક મનોરંજન પોર્ટલ સાથેની વાતચીતમાં તેમણે કહ્યું, 'હા, અમે જ બધું ખોટું કર્યું છે, તેઓએ તેમના નિવેદનમાં મારા નામનો ઉલ્લેખ કર્યો છે. તેઓ કદાચ મારા પિતાનું નામ નથી જાણતા. તેનું નામ રાશિદ ખાન છે.

તેમણે એમ પણ કહ્યું કે, 'તેમણે અમારા દાદા અને પરદાદાના નામ પણ નાખવા જોઇએ. તેઓ જે કરવા માગે છે તે કરવા દો, હું તેમને પ્રતિક્રિયા આપતા મારો સમય બગાડવા માંગતો નથી.