મુંબઇ: વર્ષ 1994માં આવેલી માધુરી દીક્ષિત અને સલમાન ખાનની રોમેન્ટિક ડ્રામા 'હમ આપકે હૈ કોન' ફિલ્મે બુધવારે રિલીઝના 26 વર્ષ પૂર્ણ કર્યા છે. ભાગ્યે જ કોઈ એવી વ્યક્તિ હશે જેને આ ફિલ્મના સંવાદો તથા ગીતો યાદ ન હોય. ખૂબ જ લોકપ્રિય થયેલી આ ફિલ્મને અત્યારના સમયમાં પણ 'કલ્ટ ક્લાસિક' નું સ્ટેટસ આપવામાં આવે છે.
માધુરી દીક્ષિતે તેના ટ્વિટર એકાઉન્ટ પર ફિલ્મની થ્રોબેક તસવીરો શેર કરી ફિલ્મના શૂટિંગ વખતની યાદો તાજી કરી હતી, " HAHKના 26 વર્ષ! વિશ્વાસ જ નથી થતો. આ સમયની રમુજી ક્ષણો, દરેક દ્રશ્યને વ્યવસ્થિત ફિલ્માવવા માટેની ટીમની મહેનત, બધું યાદ કરી રહી છું.."
માધુરીએ સલમાન સાથેના એક રિયાલિટી શોમાં આ ફિલ્મના અમુક દ્રશ્યો રિક્રિએટ કર્યા હતા. જેનો વીડિયો પણ તેણે શેર કર્યો છે.
આ ફિલ્મ 1982માં આવેલી ફિલ્મ 'નદિયા કે પાર'થી પ્રેરિત હતી. તેમ છતાં આ ફિલ્મે દર્શકોના મનમાં એટલી ઉંડી છાપ છોડી હતી કે, તેના દરેક એક એક દ્રશ્યો સાથે દર્શકો એક પ્રકારનું પોતીકાપણું અનુભવી શકતા. આજે પણ આ ફિલ્મના ગીતો દરેક લગ્નમાં આનંદપૂર્વક ગવાય છે અને સંવાદો દરેકના ચહેરા પર સ્મિત લાવે છે.
આ બ્લોકબસ્ટરને બેસ્ટ ફિલ્મ, બેસ્ટ દિગ્દર્શન સહિતની કેટેગરીમાં કુલ 13 ફિલ્મફેર એવોર્ડ એનાયત થયા હતા. જે માધુરી દીક્ષિત અને સલમાન ખાન બંને સિતારાઓ માટે ટર્નિંગ પોઇન્ટ સાબિત થયો હતો.
