ફરાહ ખાને પુત્રી અન્યાના સ્કેચનો વીડિયો શેર કર્યો, પુત્રીએ સ્કેચથી 2.5 લાખ કમાણી કરી

ફિલ્મમેકર ફરાહ ખાને તેના સોશિયલ મીડિયા હેન્ડલ પર પુત્રીએ બનાવેલાં સ્કેચનો વીડિયો શેર કર્યો હતો.

મુંબઈઃ ફિલ્મમેકર ફરાહ ખાને તેના સોશિયલ મીડિયા હેન્ડલ પર એક વીડિયો શેર કર્યો છે. જેમાં પુત્રી અન્યાએ બનાવેલા સ્કેચ બતાવ્યાં હતા. આ બધાં સ્કેચ અન્યાએ રખડતાં પ્રાણીઓને મદદ કરવા માટે બનાવ્યાં છે. ફરાહે કહ્યું કે, આ કામ કરતી વખતે અન્યાએ અત્યાર સુધીમાં 2.5 લાખ રૂપિયાથી વધુનો સંગ્રહ કર્યો છે અને દાન આપ્યું છે.

ફરાહ ખાને વીડિયો કેપ્શનમાં લખ્યું છે કે, '100થી વધુ સ્કેચ બનાવવામાં આવ્યાં છે, જેમાંથી 2.5 લાખ રૂપિયાથી વધુ એકત્રિત કરી દાન કરવામાં આવ્યું છે. ફાળો આપનારા બધા ઉદાર લોકોનો આભાર. અન્યા બીજા રાઉન્ડના ઓર્ડર પણ લેવા તૈયાર છે. દિવા કુંડાર (પુત્રી) દ્વારા વીડિયો શૂટ કરવામાં આવ્યો છે.' વીડિયોમાં 12 વર્ષીય અન્યાએ બનાવેલા તમામ સ્કેચને ઘરમાં પ્રદર્શનોની જેમ સજાવવામાં આવ્યાં હતાં.

આ પોસ્ટ પર એક બૉલિવૂડ સ્ટાર્સે કોમેન્ટ કરી છે. કર્તિક આર્યન, ભાવના પાંડે, સોનુ સૂદ, અપારશક્તિ ખુરાના અને રકુલપ્રીત સિંહ સહિતના ઘણા સેલેબ્સે અન્યાની પ્રશંસા કરી છે. કાર્તિકે લખ્યું છે કે, 'સો કૂલ' પછી ફરાહે તેને કહ્યું, 'ઓર્ડર દો.' સોનુ સૂદે કોમેન્ટ કરી હતી કે અન્યા 'સાચી રોકસ્ટાર' છે, જેના જવાબમાં ફરાહે લખ્યું, 'તમારા માટે જ છે'. રકુલપ્રીતે લખ્યું, 'વાહ લવલી'.

તમને જણાવી દઈએ કે, લોકડાઉન દરમિયાન અન્યા રસ્તા પર રહેતા અને બેઘર પ્રાણીઓના ખાવા પીવા માટે પાલતું પ્રાણીના સ્કેચ બનાવીને પૈસા એકત્ર કરી રહી છે. તે દરેક સ્કેચ માટે એક હજાર રૂપિયા લે છે અને અત્યાર સુધીમાં ઘણા બોલિવૂડ સેલેબ્સે તેના પાલતું પ્રાણીના તેના સ્કેચ લીધા છે.