બચ્ચન પિતા પુત્રને કોરોના..! બોલિવૂડ સેલેબ્સ કરી રહ્યા છે રિકવરીની કામના

સદીના મહાનાયક અમિતાભ બચ્ચન અને તેમના પુત્ર અભિષેક બચ્ચન નો કોરોના રિપોર્ટ પોઝિટિવ આવતા તેમને મુંબઇની નાણાવટી હોસ્પિટલમાં દાખલ કરવામાં આવ્યા છે. આ સમાચાર સામે આવતા જ બોલિવૂડના દરેક સેલિબ્રિટી તેમને સોશીયલ મીડિયા પર ઝડપથી સ્વસ્થ થવાની શુભકામનાઓ પાઠવી રહ્યા છે.

મુંબઈ: બોલિવૂડના શહેનશાહ અમિતાભ બચ્ચન અને તેમના પુત્ર અભિષેક બચ્ચનનો કોરોના વાઇરસ રિપોર્ટ પોઝિટિવ આવ્યો છે. તેમને મુંબઇની નાણાવટી હોસ્પિટલમાં દાખલ કરી સારવાર આપવામાં આવી રહી છે. ઉપરાંત ઐશ્વર્યા રાય બચ્ચન અને આરાધ્યાનો રિપોર્ટ પણ પોઝિટિવ આવ્યો છે જ્યારે જયા બચ્ચનનો રિપોર્ટ નેગેટિવ આવ્યો છે.

બિગબી અને અભિષેક બચ્ચન બંનેએ તેમના સોશીયલ મીડિયા હેન્ડલ પર આ વાતની માહિતી આપી હતી જે પછી તમામ બોલિવૂડ સેલેબ્સ પોતપોતાના સોશીયલ મીડિયા પર પોસ્ટ મૂકી તેઓ ઝડપથી સ્વસ્થ થાય તે માટેની કામના કરી રહ્યા છે.

જેમાં માધુરી દીક્ષિત નેને, તાપસી પન્નુ, સોનમ કપૂર આહુજા, શાહિદ કપૂર અને રીતેશ દેશમુખ જેવા કલાકારો સામેલ છે.

પ્રિયંકા ચોપરાએ લખ્યું, "અમિતજી અને અભિષેક બચ્ચનના સ્વાસ્થ્યમાં સુધાર માટે પ્રાર્થના.."

અનુપમ ખેરે ટ્વીટ કરતા કહ્યું, "આદરણીય અમિતાભ બચ્ચન જી, તમે તમારા જીવનમાં અનેક મુશ્કેલીઓનો સામનો કર્યો છે. મને અને દેશના લોકોને તમારા પર ભરોસો છે કે તમે કોરોનાની લડાઇ પણ જીતી જશો. સૌની પ્રાર્થનાઓ તમારી સાથે છે."

અભિનેતા વિકી કૌશલે પણ તેના ઈન્સ્ટાગ્રામ પર બિગબીની ઝડપી રિકવરી માટે કામના કરી હતી.

ઉલ્લેખનીય છે કે અભિષેક તેની ફિલ્મોના ડબિંગ માટે દરરોજ ઘરની બહાર નીકળતો હતો. હાલમાં જ તેની વેબ સિરીઝ 'બ્રિધ : ઇન્ટુ ધ શેડોઝ ' એમેઝોન પ્રાઈમ વીડિયો પર રિલીઝ થઇ છે.