અમિતાભ બચ્ચનનો કોરોના રિપોર્ટ આવ્યો નેગેટિવ, હોસ્પિટલમાંથી ડિસ્ચાર્જ

અમિતાભ બચ્ચનનો કોરોના રિપોર્ટ નેગેટિવ આવ્યા બાદ તેમને નાણાવતી હોસ્પીટલમાંથી ડિસ્ચાર્જ કરવામાં આવ્યા છે. અભિષેક બચ્ચને ટ્વિટ કરી આ વાતની જાણકારી આપી છે.

મુંબઈઃ બોલીવૂડના શહેનશાહ અમિતાભ બચ્ચનનો કોરોના રિપોર્ટ નેગેટિવ આવ્યો છે ત્યારબાદ તેમને હોસ્પિટલમાંથી ડિસ્ચાર્જ કરવામાં આવ્યા છે. અભિષેક બચ્ચને ટ્વીટ કરીને આ વિશે માહિતી આપી છે. અભિષેકે ટ્વિટ કર્યું - મારા પિતાનો લેટેસ્ટ કોવિડ-19નો રિપોર્ટ નેગેટિવ આવ્યો છે અને તેમને હોસ્પિટલમાંથી રજા આપવામાં આવી છે. હવે તે ઘરે આરામ કરશે. તમારી પ્રાર્થના અને શુભેચ્છાઓ બદલ આભાર.

આ સાથે અભિષેકે એક અન્ય ટ્વિટમાં કહ્યું કે તે હજી પણ કોરોના વાયરસથી સંક્રમિત છે અને તેની સારવાર ચાલુ રહેશે.

બીજા એક ટ્વિટમાં તેમણે લખ્યું કે, "દુર્ભાગ્યે હું હજી પણ કોવિડ -19 પોઝિટિવ અને હોસ્પિટલમાં છું. ફરી એકવાર, મારા પરિવાર માટે શુભેચ્છાઓ અને પ્રાર્થના બદલ આપ સૌનો આભાર. હું ટૂંક સમયમાં આ વાઇરસને હરાવીશ અને હું તંદુરસ્ત પરત આવીશ... વચન. "