પન્નુની હત્યાના કથિત ષડયંત્ર કેસમાં અમેરિકાના વિદેશ મંત્રીનું મોટું નિવેદન, શું કહ્યું તેમણે જાણો...

આ સમગ્ર મામલો ભારત દ્વારા આતંકવાદી જાહેર કરાયેલા ખાલિસ્તાની નેતા ગુરપતવંત સિંહ પન્નુ સાથે સંબંધિત છે, બુધવારે, યુએસ ફેડરલ પ્રોસિક્યુટર્સે ભારતીય નાગરિક નિખિલ ગુપ્તા પર પન્નુની હત્યાના નિષ્ફળ કાવતરામાં સામેલ હોવાનો આરોપ મૂક્યો હતો. આ મામલે ભારતની પ્રતિક્રિયા આવ્યા બાદ અમેરિકી વિદેશ મંત્રીએ આ પ્રકારનું નિવેદન આપ્યું હતું.

વોશિંગ્ટન:અમેરિકાના વિદેશ મંત્રી એન્ટની બ્લિંકને ગુરુવારે કહ્યું કે નવી દિલ્હી દ્વારા અમેરિકાના આરોપોની તપાસની જાહેરાત કરવી તે સારું અને યોગ્ય છે. આપને જણાવી દઈએ કે ભારત પર અમેરિકામાં એક શીખ અલગતાવાદીની હત્યાનું કાવતરું ઘડવાનો આરોપ છે. જે બાદ ભારતે જવાબ આપતા કહ્યું કે આ ચિંતાનો વિષય છે. ભારત તરફથી કહેવામાં આવ્યું હતું કે, એક ઉચ્ચ સ્તરીય તપાસ સમિતિ આ સંદર્ભે તમામ પાસાઓની તપાસ કરશે.

ભારતની નીતિઃ વિદેશ મંત્રાલયના પ્રવક્તા અરિંદમ બાગચીએ ગુરુવારે જણાવ્યું હતું કે, યુએસ કોર્ટમાં કથિત રીતે એક ભારતીય અધિકારી સાથે સાંકળવાનો કેસ દાખલ કરવામાં આવ્યો છે, જે ચિંતાનો વિષય છે. તેમણે મીડિયાને સંબોધતા કહ્યું કે, આ સરકારની નીતિની વિરુદ્ધ છે. ભારતની આ પ્રતિક્રિયા પર અમેરિકી વિદેશ મંત્રીએ પોતાની પ્રતિક્રિયા આપી છે. બ્લિંકને ઈઝરાયેલના તેલ અવીવમાં પોતાની સાથે મુસાફરી કરી રહેલા પત્રકારોને જણાવ્યું હતું કે, ભારત સરકારે જાહેરાત કરી છે કે, તે તપાસ કરી રહી છે અને તે સારું અને યોગ્ય છે. અમે પરિણામો જોવા માટે આતુર છીએ.

અમેરિકાનું વલણઃ બ્લિંકન બુધવારે મેનહટ્ટન કોર્ટમાં ફેડરલ યુએસ પ્રોસિક્યુટર્સ દ્વારા દાખલ કરવામાં આવેલા આરોપમાં એક ભારતીય નાગરિક સાથે અનામી ભારતીય અધિકારીની હાજરી અંગેના એક પ્રશ્નનો જવાબ આપી રહ્યા હતા. તેમણે કહ્યું કે આ એક કાયદાકીય મામલો છે. જેની કાર્યવાહી ચાલુ છે. તેથી હું આ વિશે વિગતવાર ટિપ્પણી કરી શકતો નથી. હું કહી શકું છું કે આ એવી વસ્તુ છે, જેને આપણે ખૂબ ગંભીરતાથી લઈએ છીએ. છેલ્લા અઠવાડિયામાં આપણામાંથી ઘણાએ આ વાત સીધી ભારત સરકાર સાથે ઉઠાવી છે.