Russia News: હજારોની સંખ્યામાં વૈગનર ઘુસણખોરો રશિયામાં ઘુસી ગયા, સુરક્ષા વધારાઈ

રશિયા અને વેગનર ગ્રૂપ વચ્ચે ચાલી રહેલા વિવાદે હવે ગૃહયુદ્ધનો વળાંક લીધો છે. વેગનર ગ્રૂપના ચીફ યેવજેની પ્રિગોઝિને રશિયન સંરક્ષણ પ્રધાન સેરગેઈ શોઇગુને હટાવવા માટે સશસ્ત્ર બળવો કરવાની હાકલ કરી છે. રશિયાની આંતરિક તપાસ એજન્સી, ફેડરલ સિક્યોરિટી સર્વિસ (FSB) એ પ્રિગોઝિન સામે રાજદ્રોહ અને સશસ્ત્ર ક્રાંતિના આહ્વાનને ધ્યાનમાં રાખીને રાજદ્રોહનો કેસ દાખલ કર્યો છે.

મોસ્કોવઃ એફએસબીએ વેગનરના લડવૈયાઓને પ્રિગોઝિનના ગુનાહિત અને વિશ્વાસઘાતના આદેશોનો અનાદર કરવા અને તેને અટકાયતમાં લેવા કહ્યું છે. બીજી બાજુ, પ્રિગોઝિનના વેગનરના લડવૈયાઓ રશિયન શહેર રોસ્ટોવ-ઓન-ડોનમાં પ્રવેશ્યા છે. વેગનર ગ્રુપનું અધિકૃત મુખ્ય મથક પણ આ શહેરમાં આવેલું છે. તે સધર્ન સેક્ટર માટે રશિયન સૈન્યનું મુખ્ય મથક પણ છે, જે યુક્રેનમાં લડાઈની કમાન્ડમાં છે. રશિયાના રાષ્ટ્રપ્રમુખ પુતિને સ્થિતિને ધ્યાને લઈને જણાવ્યું હતું કે, હું રશિયાની સુરક્ષા માટે કોઈ પણ પગલું ભરીશ

મોરચો માંડ્યોઃપ્રિગોઝિનને નાયબ સંરક્ષણ પ્રધાન ઇવકુરોવ અને જીઆરયુના નાયબ અલેકસેવ દ્વારા રોસ્ટોવમાં સધર્ન મિલિટરી ડિસ્ટ્રિક્ટ હેડક્વાર્ટર ખાતે મળ્યા હતા. તેણે રશિયાના રક્ષા મંત્રી સર્ગેઈ શોઈગુ અને જનરલ વેલેરી ગેરાસિમોવને મળવાની ઈચ્છા વ્યક્ત કરી છે. આ તે બે લોકો છે જેમની સામે પ્રિગોઝિને મોરચો ખોલ્યો છે. પ્રિગોઝિનને રશિયન રાષ્ટ્રપતિ વ્લાદિમીર પુતિનના જૂના મિત્ર માનવામાં આવે છે. આવી સ્થિતિમાં તેમનું વેગનર ગ્રુપ રશિયા સામે યુદ્ધની ઘોષણા કરે તેવી શક્યતા ઓછી છે. આ હોવા છતાં, રશિયન સૈન્યએ રશિયાના તમામ રાજ્યો અને મોટા શહેરોમાં સુરક્ષા વધારી છે.

સુરક્ષા વધારીઃયેવજેની પ્રિગોઝિનની ધમકીને ગંભીરતાથી લેતા, રશિયાએ મોસ્કો અને રોસ્ટોવ-ઓન-ડોનમાં સુરક્ષા વધારી છે. સામાન્ય નાગરિકોને બિનજરૂરી બહાર ન નીકળવા માટે કહેવામાં આવ્યું છે. હજુ સુધી રશિયન સેના અને વેગનર લડવૈયાઓ વચ્ચે કોઈ હિંસક અથડામણની જાણ થઈ નથી. કેટલાક સ્થળોએ સૈન્યના વાહનોમાં આગ લગાવવાની તસવીરો સામે આવી છે, પરંતુ હજુ સુધી એ વાતની પુષ્ટિ થઈ નથી કે તેમને આગ કોણે લગાવી છે. પ્રિગોઝિન, જો પકડાય છે, તો તેને રાજદ્રોહ માટે 20 વર્ષ સુધીની જેલ થઈ શકે છે. તે જ સમયે, જો તે સફળ થાય છે, તો રાષ્ટ્રપતિ વ્લાદિમીર પુતિનની શક્તિ નબળી પડી શકે છે. જોકે, પ્રિગોઝિને સ્પષ્ટ કર્યું છે કે તેઓ રશિયામાં બળવા નથી ઈચ્છતા, પરંતુ સંરક્ષણ પ્રધાનને તેમના પદ પરથી હટાવવાનો પ્રયાસ કરી રહ્યા છે.