Israel Hamas war: ઈઝરાયલ-હમાસ યુદ્ધ 'સ્પષ્ટપણે અસ્વીકાર્ય' છે, UNGAમાં ભારતનો નક્કર અભિગમ

ભારતે ગાઝામાં ઈઝરાયલ દ્વારા કરવામાં આવેલ નાગરિકોની હત્યાને વખોડી કાઢી છે. ભારતે કહ્યું કે ઈઝરાયલના કૃત્યથી મોટી સંખ્યામાં નાગરિકો વસે છે તે ક્ષેત્રમાં સમસ્યા સર્જાઈ છે. UNGAમાં સંબોધન દરમિયાન ભારતના પરમેનન્ટ રીપ્રેઝન્ટેટિવ રુચિરા કમ્બોજે કહ્યું કે, બંને દેશો વચ્ચે શાંતિનો એક માત્ર ઉપાય અર્થપૂર્ણ વાતચીતથી જ આવી શકે છે. વાંચો સમગ્ર સમાચાર વિસ્તારપૂર્વક. Israel Hamas War Clearly Unacceptable India UNGA

નવી દિલ્હીઃ યુનાઈટેડ નેશન્સમાં ભારતના પરમેનન્ટ રીપ્રેઝન્ટેટિવ રુચિરા કમ્બોજે કહ્યું કે, ગાઝામાં ચાલી રહેલા ઈઝરાયલ અને હમાસ વચ્ચેના યુદ્ધમાં નાગરિકોનુ જનજીવન ખોરવાઈ રહ્યું છે. આ ભયાનક માનવીય સંકટ 'સ્પષ્ટ રીતે અસ્વીકાર્ય' છે.

ઈઝરાયલ હમાસ યુદ્ધમાં મોટી સંખ્યામાં નાગરિકો, ખાસ કરીને મહિલાઓ અને બાળકોએ જીવ ગુમાવ્યો છે. જે એક ભયાનક માનવીય સંકટ છે. ભારત નાગરિકોના મૃત્યુની સખત ટીકા કરે છે અને આ સંકટ સ્પષ્ટ રુપે અસ્વીકાર્ય છે. રુચિરા કમ્બોજે કહ્યું કે, અમને ખબર છે 7 ઓક્ટોબરે હમાસે કરેલ આતંકવાદી હુમલો આ યુદ્ધનું મુખ્ય કારણ છે. આ હુમલાને પણ ભારત વખોડે છે. ભારતનો આતંકવાદ પ્રત્યે ઝીરો ટોલરન્સ એપ્રોચ છે.

મંગળવારે પશ્ચિમ એશિયામાં યુનાઈટેડ નેશન્સ જનરલ એસેમ્બલી(UNGA)માં સંબોધન કરતી વખતે રુચિરા કમ્બોજે કહ્યું કે, ગાઝા યુદ્ધ વિસ્તારમાં શાંતિ બનાવવા માટે અને બને તેટલી વધુ માનવીય સહાય પહોંચાડવા માટે ભારત પ્રયત્નશીલ છે.

ભારતનું શીર્ષ નેતૃત્વ ઈઝરાયલ અને પેલેસ્ટાઈનના નેતાઓ સાથે સતત સંપર્કમાં છે. અમે જી-20, બ્રિક્સ જેવા સંમેલનોમાં અને નવેમ્બર 2023માં યોજાયેલ ગ્લોબલ સાઉથ શિખર સંમેલનમાં અમારા વિચાર રજૂ કર્યા હતા. અમે આ મુદ્દે કાયમી અને સઘન ઉકેલની હિમાયત કરી છે. અમે મોટી સંખ્યામાં નાગરિકો વસતા હોય તેવા વિસ્તારોમાં સતત માનવીય સહાય પહોંચાડવાનું આહવાન પણ કર્યુ છે. આ સંદર્ભે અમને આશા છે કે સીક્યુરિટી કાઉન્સિલ રીઝોલ્યુશન 2720 માનવીય સહાયતા વધારવામાં સહયોગ કરશે.

ભારતે પેલેસ્ટાઈનમાં અત્યાર સુધી 70 ટન માનવીય સહાયતા પૂરી પાડી છે. જેમાં બે તબક્કામાં 16.5 ટન દવાઓ અને તબીબી સહાયનો સમાવેશ થાય છે. ભારતે 5 મિલિયન ડોલર પણ દાન કર્યા છે. જેમાં 2.5 મિલિયન અમેરિકન ડોલર્સનો સમાવેશ થાય છે. ડિસેમ્બર 2023માં યુનાઈટેડ નેશન્સની એજન્સી જે પેલેસ્ટાઈન શરણાર્થીઓ માટે શિક્ષણ, આરોગ્ય, રાહત અને સામાજિક સેવાકાર્યો કરે છે તેનું ભારતે સમર્થન પણ કર્યુ છે.

યુનાઈટેડ નેશન્સમાં ભારતના પરમેનન્ટ રીપ્રેઝન્ટેટિવ રુચિરા કમ્બોજે ફરીથી ભારપૂર્વક કહ્યું કે, વાતચીત અને કૂટનીતિના માધ્યમથી જ આ યુદ્ધનો શાંતિપૂર્ણ ઉકેલ આવી શકે છે.

આ યુદ્ધની શરુઆત થઈ ત્યારથી ભારતે આપેલ સંદેશ સ્પષ્ટ અને સુસંગત છે. કમ્બોજે કહ્યું કે, માનવીય સહાયને સતત પહોંચાડવી, શાંતિ અને સ્થિરતા સ્થાપવી તેમજ વધતી જતી યુદ્ધની સ્થિતિને અટકાવવાની દિશામાં કામગીરી કરવી બહુ મહત્વની છે. વાતચીત અને કૂટનીતિના માધ્યમથી જ આ યુદ્ધનો શાંતિપૂર્ણ ઉકેલ લાવી શકાશે.

આ શાંતિપૂર્ણ ઉકેલની ઈઝરાયલ અને પેલેસ્ટાઈનના નાગરિકો ઈચ્છા કરી રહ્યા છે. તેથી અમે આગ્રહ કરીએ છીએ કે તણાવગ્રસ્ત સ્થિતિ પેદા ન કરો. હિંસા છોડો અને શાંતિપૂર્ણ ચર્ચા બને તેટલી સત્વરે શરુ કરો.