વોશિંગ્ટન: અમેરિકાના રાષ્ટ્રપતિ ડોનાલ્ડ ટ્રમ્પે ટિકટોક અને વીચેટ જેવા લોકપ્રિય ચાઇનીઝ એપ પર પ્રતિબંધ મૂકતા કાર્યકારી હુકમ પર હસ્તાક્ષર કર્યા છે. તેમણે આ એપ્સને રાષ્ટ્રીય સુરક્ષા અને દેશના અર્થતંત્ર માટે જોખમી ગણાવ્યું છે.
ટ્રમ્પે બે અલગ અલગ કાર્યકારી આદેશમાં કહ્યું હતું કે આ પ્રતિબંધ 45 દિવસમાં અમલમાં આવશે.નોંધનીય છે કે ટિકટોક અને વીચેટ પર પ્રતિબંધ લગાવનાર ભારત પ્રથમ દેશ છે. ભારતે રાષ્ટ્રીય સુરક્ષાની ચિંતાને ધ્યાનમાં રાખીને પ્રતિબંધ લગાવ્યો હતો. ભારતે 106 ચાઇનીઝ એપ્સ પર પ્રતિબંધ મૂક્યો છે. ટ્રમ્પ વહીવટ અને અમેરિકન સાંસદો દ્વારા ભારતના આ પગલાંને આવકારવામાં આવ્યો છે.
ટ્રમ્પે કોંગ્રેસને મોકલેલી સરકારી માહિતીમાં કહ્યું છે કે, યુએસમાં ચાઇનીઝ કંપનીઓની માલિકીમાં વિકસિત મોબાઇલ એપ્સનો પ્રસાર રાષ્ટ્રીય સુરક્ષા, વિદેશ નીતિ અને દેશના અર્થતંત્ર માટે જોખમી છે.ટ્રમ્પે કહ્યું કે, ચાઇનીઝ કંપની બાઇટડાન્સ લિમિટેડની માલિકીની વીડિયો શેરિંગ મોબાઇલ એપ્લિકેશન, ટિકટોક તેના યૂઝર્સ પાસેથી ઘણી માહિતી મેળવે છે.