એનિમલની સફળતાને કારણે આત્મવિશ્વાસથી ભરપૂર એવી રશ્મિકા આવતીકાલથી પુષ્પા-૨ના નવા શિડ્યુઅલનું શૂટિંગ શરૂ કરશે

અત્યારે રશ્મિકા મંદાના સફળતાનો ભરપૂર આનંદ માણી રહી છે. પુષ્પા-૧ હિટ થયા બાદ તેની એનિમલ પણ બ્લોકબસ્ટર રહી છે. પુષ્પાની સફળતા મળ્યા બાદ રશ્મિકા મંદાનાને પ્રેક્ષકોનો ભરપૂર પ્રેમ મળ્યો છે. વાંચો સમગ્ર સમાચાર વિસ્તારપૂર્વક

હૈદરાબાદ: રશ્મિકા મંદાનાએ તાજેતરમાં સફળતાનો સ્વાદ ચાખવા મળ્યો છે. તેની રણબીર કપૂર સ્ટારર ફિલ્મ એનિમલ બ્લોકબસ્ટર સાબિત થઈ છે. અત્યારે રશ્મિકા એનિમલની સફળતાને કારણે આત્મવિશ્વાસથી ભરપૂર છે. રશ્મિકા પુષ્પા-૨, ધી રૂલ ફિલ્મના આગામી શિડ્યૂલનું શૂટિંગ આવતીકાલથી શરૂ કરશે.

ચાહકોનો ભરપૂર પ્રેમ: પુષ્પા-1, ધી રાઈઝિંગમાં રશ્મિકાએ ભજવેલ શ્રીવલ્લીના પાત્રને દર્શકોએ ભરપૂર પ્રેમ આપ્યો હતો. આ ફિલ્મ બાદ રશ્મિકાને નેશનલ ક્રશનું બિરૂદ પણ મળ્યું હતું. આવતીકાલથી રશ્મિકા પુષ્પા ફિલ્મની સિક્વલ પુષ્પા-૨, ધી રૂલના આગામી શિડ્યૂઅલનું શૂટિંગ શરૂ કરવા જઈ રહી છે.

ઓનલાઈન કેમ્પેન: પુષ્પા-2 સંદર્ભે એવી વાતો વહેતી થઈ હતી કે આ ફિલ્મમાં રશ્મિકાનું પાત્ર શ્રીવલ્લી મૃત્યુ પામે છે. જેનો ઓનલાઈન બહુ વિરોધ થયો હતો. પ્રેક્ષકો શ્રીવલ્લીના પાત્રના મૃત્યુનો સ્વીકાર જ કરી શક્યા નહીં. પ્રેક્ષકોએ એક ઓનલાઈન કેમ્પેન ચલાવીને શ્રીવલ્લીના પાત્રને યોગ્ય ન્યાય મળે તેવી માંગણી કરી હતી. જેના પરિણામે મેકર્સે ખાસ સ્પષ્ટતા કરવી પડી છે.

મેકર્સે કરવી પડી સ્પષ્ટતા: શ્રીવલ્લીના પાત્ર માટે આટલી લોકપ્રિયતા અને આ ઓનલાઈન કેમ્પેન ચાલ્યા બાદ મેકર્સે ખાસ સ્પષ્ટતા કરી છે. મેકર્સે જણાવ્યું કે રશ્મિકાનું પાત્ર શ્રીવલ્લી પુષ્પા-૨માં મૃત્યુ પામવાનું નથી. રશ્મિકાનો રોલ ફૂલ ફલેજેડ છે. તેમજ આવતીકાલ એટલે કે 13 ડિસેમ્બરથી હૈદરાબાદમાં રશ્મિકા પુષ્પા-2, ધી રૂલનું શૂટિંગ શરૂ કરવા જઈ રહી છે. આ સ્પષ્ટતા બાદ ચાહકો શાંત થયા છે. પુષ્પા ફિલ્મ ફ્રેન્ચાઈઝીમાં મેકર્સને માત્ર અલ્લુ અર્જુન દ્વારા અભિનિત પાત્રને જ આટલી લોકચાહના મળવાનો અંદાજ હતો, પણ દર્શકોએ પુષ્પા ઉપરાંત હીરોઈન રશ્મિકાના પાત્ર શ્રીવલ્લીને પણ ભરપૂર પ્રેમ આપતા મેકર્સને બખ્ખા થઈ ગયા છે.