Jia khan Suicide Case: જિયા ખાન આત્મહત્યા કેસમાં અભિનેતા સૂરજ પંચોલી નિર્દોષ જાહેર

જિયા ખાન સ્યુસાઈડ કેસમાં અભિનેતા સૂરજ પંચોલીને મુક્ત કરી દેવામાં આવ્યા છે. CBIની વિશેષ અદાલત દ્વારા આત્મહત્યા માટે ઉશ્કેરવાના મામલે કોર્ટે એમને નિર્દોષ જાહેર કર્યા છે.

મુંબઈ: CBIની વિશેષ અદાલત દ્વારા જિયા ખાનના મૃત્યુના કેસની સુનાવણી હાથ ધરાઈ હતી. જેમાં અભિનેતા સૂરજ પંચોલીને નિર્દોષ જાહેર કરવામાં આવ્યો છે. અભિનેત્રી જિયા ખાને 3 જૂન 2013ના રોજ આત્મહત્યા કરી હતી. સૂરજ પંચોલી પર આત્મહત્યા માટે પ્રેરિત કરવાનો આરોપ હતો.

સુસાઈડ નોટમાં ખુલાસા:જિયા ખાને મૃત્યુ પહેલા લખેલી સુસાઈડ નોટમાં ઘણા મહત્વના ખુલાસા કર્યા છે. 6 પાનાની આ નોટમાં તેણે સૂરજ સાથેના તેના સંબંધો વિશે પણ વાત કરી હતી. આ સુસાઈડ નોટ અંગે પોલીસે અનેક લોકોની પૂછપરછ કરી હતી. જિયા ખાને અભિનેત્રી તરીકે બોલિવૂડ સ્ટાર્સ સાથે કામ કર્યું હતું. તેણે અમિતાભ બચ્ચન સાથે તેની પ્રથમ ફિલ્મ નિશબ્દ કરી હતી. આ પછી જિયાએ આમિર ખાન સાથે 'ગજની' અને અક્ષય કુમાર સાથે 'હાઉસફુલ'માં પણ કામ કર્યું હતું.

સૂરજ પંચોલીની ધરપકડ:આ કેસની તપાસ મુંબઈ પોલીસ દ્વારા 2013માં કરવામાં આવી હતી પરંતુ જિયા ખાનની માતા રાબિયા ખાનની વારંવારની અરજી પર બોમ્બે હાઈકોર્ટે 3 જુલાઈ 2014ના રોજ સીબીઆઈને તપાસ સોંપી હતી. પોલીસે 11 જૂન 2013ના રોજ સૂરજ પંચોલીની ધરપકડ કરી હતી અને તેના પર જિયાને આત્મહત્યા માટે પ્રેરિત કરવાનો આરોપ લગાવ્યો હતો. જે બાદ બોમ્બે હાઈકોર્ટે સૂરજને જામીન આપ્યા હતા.

જિયા ખાનની હત્યાનો દાવો:થોડા સમય પહેલા આ કેસની મુખ્ય સાક્ષી અને જિયા ખાનની માતા રાબિયા ખાને કોર્ટને કહ્યું હતું કે આ કેસ આત્મહત્યાનો નહીં પરંતુ હત્યાનો હતો. ગયા વર્ષે બોમ્બે હાઈકોર્ટે આ મામલે નવેસરથી તપાસની માંગ કરતી તેમની અરજી ફગાવી દીધી હતી. એક તરફ રાબિયા ખાને તેની પુત્રી માટે ન્યાયની માંગ કરી હતી, તો બીજી તરફ સૂરજે આ તમામ આરોપોને નકારી કાઢ્યા હતા. સપ્ટેમ્બર 2017માં જિયા ખાનની માતા રાબિયાએ વડાપ્રધાન નરેન્દ્ર મોદીને ખુલ્લો પત્ર લખીને ન્યાયની માંગ કરી હતી. આ પત્રમાં તેણે સીબીઆઈ તપાસની પણ ટીકા કરી છે.

આ પણ વાંચો:Jiah Khan Suicide Case: જિયા ખાન આત્મહત્યા કેસ, જાણો શું હતી આખી ટાઈમલાઈન

CBI કોર્ટ દ્વારા તપાસ:જિયા ખાનની માતા રાબિયાએ દાવો કર્યો હતો કે મારી પુત્રીના શરીર પરના ઇજાઓ કથિત આત્મહત્યા સાથે અસંગત છે અને તમામ ફોરેન્સિક પુરાવા મજબૂત રીતે દર્શાવે છે કે તેની હત્યા કરવામાં આવી હતી. બાદમાં તેને આત્મહત્યા જેવું લાગે તે માટે ગળે ફાંસો લગાવી દીધો હતો. જિયા ખાનની માતા રાબિયાએ ઓનલાઈન સહી ઝુંબેશ પણ શરૂ કરી હતી અને આરોપીઓ સામે કડક કાર્યવાહીની માંગ કરી હતી. વિશેષ CBI કોર્ટે 2021માં આત્મહત્યા કેસની તપાસ શરૂ કરી હતી. તે જ વર્ષે બીબીસીએ તેના પર ડેથ ઇન બોલિવૂડ નામની ડોક્યુમેન્ટ્રી બનાવી હતી.

આ પણ વાંચો:Chrisann Pereira: ક્રિસન પરેરા ડ્રગ્સ પ્લાન્ટ કેસમાં જેલમાંથી થયા મુક્ત, પરિવારને ફોન પર આપી પ્રતિક્રિયા

શું છે સમગ્ર કેસ: 3 જૂન 2013 ના રોજ મુંબઈ પોલીસે અભિનેત્રી જિયા ખાનનો મૃતદેહ તેના જુહુ એપાર્ટમેન્ટમાંથી મેળવ્યો હતો. જિયા ખાનની બહેનને 7 જૂન 2013ના રોજ સૂરજ પંચોલીને સંબોધીને લખેલી છ પાનાની હસ્તલિખિત સુસાઇડ નોટ મળી. 11 જૂન 2013ના રોજ સૂરજ પંચોલી પર આત્મહત્યા માટે ઉશ્કેરવાનો આરોપ મૂકવામાં આવ્યો હતો અને પોલીસે તેની ધરપકડ કરી હતી. 1 જુલાઈ 2013ના રોજ મુંબઈની અદાલતે જામીન આપ્યા બાદ સૂરજ પંચોલી જેલમાંથી બહાર આવ્યો હતો. આ કેસ 2014માં સેન્ટ્રલ બ્યુરો ઓફ ઈન્વેસ્ટિગેશનને સોંપવામાં આવ્યા હતા. છેવટે એક વર્ષ પછી એજન્સીએ પૂરક ચાર્જશીટ દાખલ કરી. ઓગસ્ટ 2016માં તેઓએ પુષ્ટિ કરી કે જિયાનું મૃત્યુ ગળે ફાંસો ખાવાથી થયું હતું. તેમણે હત્યાના આરોપને નકારી કાઢ્યો હતો.