- છાણી-બાજવાને જોડતા રેલ્વે ઓવરબ્રિજનું કામ 5 વર્ષે પણ અધુરું
- વડોદરાના સાંસદ રંજન ભટ્ટે રેલવે ઓવર બ્રિજનું વર્ષ 2016 માં ખાતમુહૂર્ત કર્યું હતું
- મંથર ગતિએ કામગીરી ચાલતી હોવાથી ગ્રામજનોને ભારે મુશ્કેલી
વડોદરા: જિલ્લાના સાંસદ રંજન ભટ્ટે છાણીથી બાજવાને જોડતા રેલવે ઓવર બ્રિજનું વર્ષ 2016 માં ખાતમુહૂર્ત કર્યું હતું અને કામગીરી શરૂ કરાવી હતી. બ્રિજનું કામ 18 માસમાં પૂર્ણ કરવાનું હતું પણ રાજ્ય સરકારના માર્ગ અને મકાન વિભાગ 5 વર્ષ બાદ પણ બ્રિજનું કામ પૂરું ન કરી શક્યું. માર્ગ અને મકાન વિભાગ 39 કરોડના ખર્ચે રેલવે ઓવર બ્રિજ બનાવી રહી છે પણ ધીમી ગતિએ કામગીરી ચાલતી હોવાથી ગ્રામજનોને ભારે મુશ્કેલી પડી રહી છે. મહત્વની વાત છે કે રેલવેએ ફાટક ઉપર બ્રિજની કામગીરી પૂરી કરી દીધી છે પણ રાજ્યનું માર્ગ અને મકાન વિભાગ બ્રિજની છેડા જોડી કામ નથી પૂરું કરી રહી. જેના કારણે ગ્રામજનોએ ગુરુવારે રેલવે ફાટક પાસે પહોંચી હલ્લાબોલ કર્યો હતો. તંત્ર વિરૂદ્ધ સૂત્રોચ્ચાર કર્યા સાથે જ બ્રિજની કામગીરી વહેલી પૂર્ણ કરવા માંગ કરી હતી.
છાણી બાજવાને જોડતા રેલવે ઓવરબ્રિજનું કામ 5 વર્ષે અધુરું ઓવર બ્રિજની કામગીરીના કારણે બાજવા ગામ બે ભાગમાં વહેંચાઈ ગયું
ઓવર બ્રિજની કામગીરીના કારણે બાજવા ગામ બે ભાગમાં વહેંચાઈ ગયું છે. જેમાં એક ભાગમાં સ્કૂલ તો એક ભાગમાં સરકારી દવાખાનું અને સ્મશાન આવેલું છે. બાળકોને રેલવે ફાટક ક્રોસ કરી જીવના જોખમે સ્કૂલ જવું પડે છે. તો અંતિમસંસ્કાર માટે લોકોને અઢી કિલોમીટર ફરીને સ્મશાનમાં જવાની નોબત આવી છે. રેલવે ઓવર બ્રિજ બાજવા ઉપરાંત 22 ગામને જોડતો મુખ્ય બ્રિજ પણ છે, ત્યારે લોકો કામ ક્યારે પૂર્ણ થશે તેવો સવાલ પૂછી રહ્યાં છે.
બાળકોને રેલવે ફાટક ક્રોસ કરી જીવના જોખમે સ્કૂલ જવું પડે છે
એક ગ્રામજને જણાવ્યું હતું કે, અનેકવાર માર્ગ મકાન વિભાગના અધિકારીઓ નેતાઓને રજૂઆત કરી પણ કોઈના પેટનું પાણી નથી હલતું. 18 મહિનામાં જે કામગીરી કરવાની હતી તે 5 વર્ષ બાદ પણ પૂરી નથી થઈ. હવે તંત્ર બ્રિજની કામગીરી ઝડપથી પૂરી નહિ કરે તો અધિકારીની ઑફિસમાં જઈ હલ્લાબોલ કરીશું અને આંદોલન ઉગ્ર બનાવીશું. સાયકલ ઉંચકીને રેલવે ફાટક ક્રોસ કરવું પડે છે, જેનાથી ટ્રેનની અકસ્માત થવાનો હમેશાં ભય લાગે છે. સાથે જ પરિવારના લોકો પણ ઘરે ન આવીએ ત્યાં સુધી ચિંતા કરે છે. બ્રિજનું કામ ઝડપથી થાય તો વિદ્યાર્થીઓ સહેલાઈથી ભય વગર સ્કૂલે જઈ શકશે. મહત્વની વાત છે કે બાજવા રેલવે ઓવર બ્રિજનું કામ ન થતાં હજારો લોકોને મુશ્કેલી પડી રહી છે. સાંસદ, ધારાસભ્ય, રેલવે અધિકારી, માર્ગ અને મકાનના અધિકારીઓ કેમ સાથે મળીને વહેલી તકે કામ પૂરું નથી કરાવતા તે સૌથી મોટો સવાલ છે.
