વડોદરાઃ મધ્ય ગુજરાતની સૌથી મોટી સયાજી હોસ્પિટલના કોવિડ ICU વોર્ડમાં 8 સપ્ટેમ્બરના રોજ આગ લાગી હતી, આ દૂર્ઘટનામાં મોટો ખુલાસો થયો છે. આ આગની ઘટનાને લઈ તપાસ કમિટીએ 106 દિવસ બાદ રિપોર્ટ સોંપ્યો હતો. જેમાં ધમણ વેન્ટિલેટરમાં ખામીના કારણે આગ લાગી હોવાનું FSLની તપાસમાં ઘટસ્ફોટ થયો છે.
વેન્ટિલેટર ધમણ અને કોમ્પ્રેસરમાં યાંત્રિક ખામી હતી
વડોદરાના FSLના ઈન્ચાર્જ ડી.બી. પટેલે જણાવ્યું છે કે, શહેરની સયાજી હોસ્પિટલના ICU માં વેન્ટિલેટર ધમણ લાગ્યું હતું. અમારી પાસે વેન્ટિલેટર ધમણ આવ્યું ત્યારે સળગી ગયેલી હાલતમાં હતું. વેન્ટિલેટર ધમણ અને કોમ્પ્રેસરમાં યાંત્રિક ખામી હતી અને આ ખામીને કારણે શોર્ટ સર્કિટ થવાથી આગ લાગી હતી.
ડેપ્યુટી મ્યુનિસિપલ કમિશ્નરના અધ્યક્ષ સ્થાને તપાસ સમિતિ બનાવાઈ હતી
સયાજી હોસ્પિટલમાં આગના બનાવની ગંભીરતાને લઇને વડોદરા જિલ્લા કલેક્ટર શાલિની અગ્રવાલે તપાસ માટે ડેપ્યુટી કમિશ્નર સહિત ચાર સભ્યોની સમિતિ બનાવી હતી. આ સમિતિ દ્વારા તપાસ શરૂ કરવામાં આવી હતી. આ સમિતિએ ચાર દિવસમાં આગની ઘટનાનો રિપોર્ટ આપવાનો હતો, પરંતુ 106 દિવસ બાદ હવે રિપોર્ટ આવ્યો છે, ત્યારે હવે કમિટી પોતાનો રિપોર્ટ કલેક્ટરને સબમિટ કરશે.