વડોદરામાં GRDના બોગસ કાર્ડ બનાવનારી ગેંગ ઝડપાઇ, 7 લોકોની ધરપકડ

વડોદરા શહેરમાં GRDના બોગસ આઇકાર્ડ બનાવનારી ગેંગ ઝડપાઇ છે. 15થી 22 હજાર રૂપિયામાં GRDના બોગસ કાર્ડ બનાવી દેનારી ગેંગ ઝડપાઇ છે. તોડપાણી માટે યુવકોએ કાર્ડ બનાવ્યાં હોવાનું સામે આવતા અસલાલી પોલીસે ગુનો નોંધી 7 લોકોની ધરપકડ કરી. જેમાં પાંચ લોકોને જેલ હવાલે કરાયા છે. જ્યારે બે લોકો હાલ રિમાન્ડ પર છે.

• બોગસ કાર્ડ બનાવી દેનારી ગેંગ ઝડપાઇ
• પોલીસે 7 લોકોની ધરપકડ કરી
• હોમગાર્ડની ઓફિસના કર્મચારી મારફતે બોગસ કાર્ડ બનાવ્યા હોવાનો ધટકસ્ફોટ

વડોદરાઃ શહેરમાં GRDના બોગસ આઇકાર્ડ બનાવનારી ગેંગ ઝડપાઇ છે. બુટલેગરો તેમજ વાહનચાલકો પાસેથી રૂપિયા ખંખેરવા માટે આ કાર્ડ બનાવી આપવાની વાત પર તપાસ કરવામાં આવશે. ગેંગનો પર્દાફાશ થતા અસલાલી પોલીસે 7 લોકોની ધરપકડ કરી છે. ઝડપાયેલા આરોપીઓમાં સુનિલ પરમાર, વિશાલ પરમાર, હાર્દીક પરમાર, મહેશ પરમાર, જશવંત મકવાણા, મનિષ પ્રજાપતિ, અમિત રાવલનો સમાવેશ થાય છે. જેમાં અમિત અને મનીષ મુખ્ય આરોપી છે. લાલદરવાજા ખાતે આવેલી હોમગાર્ડની ઓફિસમાં કામ કરતા એક કર્મચારી મારફતે GRDના બોગસ કાર્ડ બનાવી દીધા હોવાનો ધટકસ્ફોટ થયો છે.

ચારેય યુવકો GRDની વર્દી પહેરી કરતા હતા ડ્યુટી

સમગ્ર કૌભાંડનો પર્દાફાશ કરનારા જાલુસિંહ ચૌહાણના જણાવ્યાં મુજબ તે ત્રણ દિવસ પહેલા ડ્યુટી પર હતા, ત્યારે અસલાલી પાસે ટોલનાકા પર બે GRDના જવાનો વાહનોને રોકીને ચેંકીગ કરતા હતા. જેથી જાલુસિંહ ચૌહાણ નવા GRD જવાનોને જોઇને તેમની પાસે ગયા હતા અને તેમની પુછપરછ કરતા જાણવા મળ્યું હતુ કે, તેમનુ નામ સુનિલ પરમાર અને વિશાલ પરમાર છે. તેમના આઇકાર્ડ જોતાની સાથે જાલુસિંહ ચૌહાણને શંકા ગઇ હતી કે યુવકોએ બોગસ આઇકાર્ડ બનાવ્યાં છે. જેથી જાલુસિંહે તેમની ધરપકડ કરવાની જગ્યાએ તેમની ગેંગમાં કેટલા લોકો છે, તેની પુછપરછ અત્યંત ચપળતાપુર્વક કરી હતી. બંન્ને યુવકો સાથે બીજા પણ બે યુવકો આગળ ડ્યુટી કરતા હોવાનું જાણવા મળ્યું હતુ. જાલુસિંહ તે બન્ને યુવકો પાસે ગયા હતા. જ્યા જઇને તેમની પણ શાંતીથી પુછપરછ કરી હતી. તે બે યુવકોના નામ હાર્દિક પરમાર અને મહેશ પરમાર હતા. આ ચારેય યુવકોએ GRDની વર્દી પહેરી હતી અને ચારરસ્તા પર પોતાની ડ્યુટી કરતા હતા.

અધિકારીએ ચારેયની અટકાયત કરી

આઇકાર્ડ બોગસ હોવાનુ સામે આવતા જાલુસિંહે તેમને ડ્યુટી કરવા દીધી હતી. બીજા દિવસે તેમના અધિકારીને જાણ કરી દીધી હતી. જીઆરડીના અધિકારીએ ચારેય લોકોની અટકાયત કરી લીધી હતી. ત્યારબાદ તેમની પુછપરછ કરતા 22 હજાર રૂપિયામાં બોગસ આઈકાર્ડ બનાવ્યા હોવાનું ખુલ્યુ હતું. બકલ નંબરના આધારે આ કૌભાડનો પર્દાફાશ થયો હતો. જે બકલ નંબર કાર્ડમાં લખવામાં આવ્યો હતો, તે અસલાલીનો નહી પરંતુ સાણંદ તેમજ ધોળકા જિલ્લાના GRD જવાનનો હતો. બકલ નંબરને સર્વીસબુકમાં ચેક કરતા તે અન્ય લોકોને ફાળવેલા હોવાનું સામે આવ્યું હતું.

આ પણ વાંચો- વડોદરા : બોગસ દસ્તાવેજોને આધારે મા વાત્સલય કાર્ડ બનાવવાનું કૌભાંડ ઝડપાયું

20 કરતા વધુ લોકોને કાર્ડ બનાવી આપ્યાં હોવાનો ઘટસ્ફોટ

લાલદરવાજા ખાતે આવેલી હોમગાર્ડની ઓફિસમાં અમિત રાવલ કોમ્પ્યુટર ઓપરેટર તરીકે નોકરી કરે છે. જેમા તેમની પાસે જવાનોના તમામ ડેટા હોવાથી તેનો દુરઉપયોગ કરીને 15થી 22 હજાર રૂપિયામાં લોકોને બોગસ કાર્ડ બનાવીને આપતા હતા. અમિત રાવલ તમામને સ્માર્ટ કાર્ડ બનાવીને આપતો હતો. 20 કરતા વધુ લોકોને કાર્ડ બનાવી આપ્યાં હોવાનો ઘટસ્ફોટ થયો છે. જેમાં આરોપીઓએ તોડપાણી માટે કાર્ડ બનાવ્યાં હતા કે કેમ તે બાબતે પણ તપાસ શરૂ કરાઇ છે.