- મુથુટ ફાઈનાન્સમાં મોડી રાત્રે ચોરીનો પ્રયાસ
- દિલ્હીમાં એલાર્મ વાગતા કર્મીને એલર્ટ કરાયાં
- 2 હજાર લોકોનું રૂપિયા 20 કરોડનું સોનું બચ્યું
વડોદરાઃ શહેરના માણેજા ક્રોસિંગ પાસેની મુથુટ ફાઇનાન્સની બ્રાંચ પર તસ્કરોએ અંદર ઘૂસવા માટે ઇંટ મૂકી શટર ઊંચું કરવાનો પ્રયાસ કર્યો હતો. જોકે કર્મચારી આવી જતાં તસ્કર ભાગી ગયા હતા. સિક્યુરિટી સિસ્ટમથી દિલ્હી સ્થિત હેડ ઓફિસમાં વડોદરાની બ્રાંચ પાસે મુવમેન્ટ જણાતાં વિજિલન્સે મોડી રાત્રે બ્રાન્ચ મેનેજરને તપાસ કરવા કહેતા મેનેજરે મોકલેલી મહિલા કર્મીને જોઇ તસ્કરો ભાગી છૂટ્યા હતા. જેથી 2 હજાર લોકોનું રૂપિયા 20 કરોડનું સોનું બચી ગયું હતું.
બ્રાંચમાં સેન્સર પાસે મૂવમેન્ટ થવાથી એલાર્મ વાગ્યું હતું
ઉલ્લેખનીય છે કે, આજવા રોડ મુથુટ ફાઇનાન્સ બ્રાંચમાં ઓક્ટોબર-2018માં લૂંટનો પ્રયાસ થયો હતો. લૂંટારૂઓએ તમંચો લઈ ઘૂસી જઈ ગ્રાહકોના મોબાઈલ લૂંટી લીધા હતા. જોકે સાઇરન વાગતાં 4 લૂંટારૂઓ ભાગી ગયા હતા. મુથુટ ફાઈનાન્સના બ્રાંચ હેડ સુકેતુ જોશીએ જણાવ્યું હતું કે, માણેજા ક્રોસિંગ પાસે સાંઈ સમર્થ કોમ્પ્લેક્સમાં 2010થી મુથુટ ફાઈનાન્સની બ્રાંચ કાર્યરત છે. બ્રાંચમાં ઈન્ટરનરી ડિજિટલ સિક્યુરિટી સિસ્ટમ લાગેલી છે. બ્રાંચ બંધ થયા પછી સેન્સર પાસે મૂવમેન્ટ થાય તો એલાર્મ વાગે અને દિલ્હી સ્થિત હેડ ઓફિસમાં લાઈટ થાય છે. 19 ડિસેમ્બરે રાતે 2:15 વાગે મને વિજિલન્સ ડેસ્ક પરથી ફોન આવ્યો હતો કે, માણેજા ક્રોસિંગ પાસેની બ્રાંચમાં સેન્સર પાસે મૂવમેન્ટ થવાથી એલાર્મ વાગ્યું છે. જેથી મે બ્રાંચની નજીકમાં રહેતાં મહિલાકર્મીને તપાસ કરવા જણાવ્યું હતું.
મહિલા કર્મીને જોઇ તસ્કરો ભાગી છૂટ્યા
મહિલા કર્મી પતિ સાથે રાતના પોણા ત્રણ વાગે પહોંચતાં ત્યાં અવાજ આવતો હતો. જેથી તેમણે ફોન કરતાં પોલીસ પહોંચી હતી. રાત્રે 3 વાગે બ્રાંચ હેડ પણ ત્યાં પહોંચતા CCTV તપાસતાં જણાઇ આવ્યુ હતું કે, તસ્કરોએ બારી પાસેની ગ્રીલ તોડી એટલે સેન્સરનું એલાર્મ વાગ્યું હતું. બાદમાં મુખ્ય ગેટ પરનું શટર તોડવા લાગ્યા હતા. દરમિયાન કર્મચારીઓ આવી જતાં તસ્કરો ભાગી ગયા હતા.
