કપલ ચેલેન્જઃ લોકો કહી રહ્યાં છે કે આ છે અસલી કપલ ચેલેન્જ! સુરતના કોરોનાગ્રસ્ત દંપતિની વાત

છેલ્લાં કેટલાક સમયથી સોશિયલ મીડિયામાં રિયલ લાઈફ ચેલેન્જ જોવા મળી રહી છે પરંતુ સુરતમાં અસલી કપલ ચેલેન્જ કોરોનાગ્રસ્ત દંપતિએ પાર પાડી છે. જેણે આ વાત સાંભળી તે લોકો કહી રહ્યાં છે કે આ છે અસલી કપલ ચેલેન્જ.

સુરત : સુરતમાં કોરોના દર્દીઓની સંખ્યા વધી રહી છે ત્યારે કોરોનાગ્રસ્ત દંપતિ પૈકી પત્નીને પહેલાં ડિસ્ચાર્જ મળ્યો પણ પતિને છોડીને ઘેર જવાની ના પાડી દીધી હતી. દંપતિ સાથે કોરાનાગ્રસ્ત થયાં અને સાથે જ સાજા થઈને બહાર નીકળ્યાં. હમણાં ફેસબુક પર કપલ ચેલેન્જ જોરશોરથી ચાલી રહી છે. કપલ્સ તેના ફોટા શેયર કરીને આ ચેલેન્જને સ્વીકારી રહ્યાં છે. આ વર્ચ્યુલ ચેલેન્જ વચ્ચે સુરતમાં એક એવી કપલ ચેલેન્જ જોવા મળી જેને જોઈને સૌ કોઈ કહી ઉઠ્યાં વાહ આ જ છે, અસલી કપલ ચેલેન્જ.

60 દિવસ સુધી હોસ્પિટલમાં સાથે રહ્યાં અને બાદમાં બન્ને સાથે જ ઘેર પરત ફર્યાં

સુરતના અડાજણ વિસ્તારમાં રહેતાં નીતિનભાઈ ચંદ્રા હજીરામાં આવેલી એનટીપીસીમાં એડિશનલ ચીફ એન્જિનિયર તરીકે ફરજ બજાવે છે. તેમને શરદી, શ્વાસ લેવામાં જેવી તકલીફ થતાં કોરોના ટેસ્ટ કરાવ્યો હતો. જેનો રિપોર્ટ પોઝિટિવ આવ્યો હતો. જેથી તેને સારવાર માટે શહેરની ખાનગી હોસ્પિટલમાં ખસેડયો હતો. ફેફસામાં ભારે નુકશાન હોવાથી તેની હાલત ગંભીર હતી. બાદમાં તેની પત્નીનો કોરોના ટેસ્ટ કરાવતાં તે પણ પોઝિટિવ રિપોર્ટ આવ્યો હતો. જેથી તેને પણ હોસ્પિટલ ખસેડાઇ હતી. જો કે પતિની ઈચ્છા હતી કે પત્ની તેની બાજુમાં રહે. એટલે નજીક નજીકમાં બંનેની સારવાર શરૂ થઈ.

ડોક્ટરની ટીમની સરાહનીય કામગીરીને પગલે પત્નીની હાલત સુધરવા લાગી અને આખરે તેને ડિસ્ચાર્જ કરવાનો નિર્ણય લેવાયો. ડોકટરે તેમને કહ્યું કે તમે સંપૂર્ણ સ્વસ્થ છો હવે ઘેર જઈ શકો છો. તમારા પતિની સ્થિતિ થોડી ગંભીર છે પણ અમે સંભાળી લઈશું અને સાજા કરીને ચોક્કસ ઘેર મોકળીશું. પરંતુ પત્નીને તેના એકલાના સાજા થવાથી સંતોષ ન હતો. તેમને પ્રેમથી ડોક્ટરને ઘરે જવાની ના પાડીને પતિની સાથે જ રહેવા દેવા વિનંતી કરી. ડોકટરે ના પાડી તેમ છતાં પત્નીએ હઠ કરતાં આખરે ડોકટર તૈયાર થયાં તેને પતિ પાસે રહેવા રજા આપી. પતિપત્નીને સાથે કોરોના થયા બાદ પત્નીને કોરોનામુક્ત થઈ હોવા છતાં પતિનો સાથ ન છોડતાં 60 દિવસ સુધી હોસ્પિટલમાં સાથે રહ્યાં અને બાદમાં બન્ને સાથે જ હોસ્પિટલમાંથી ઘેર પરત ફર્યાં હતાં.