સુરતઃ દિગસથી અજાણ્યા યુવાનનું મળ્યુ માથું અને ધડ, પોલીસે હત્યાનો ગુનો નોંધી તપાસ હાથ ધરી

સુરત જિલ્લાના કામરેજ તાલુકાના દિગસ ગામની સીમમાંથી 24 નવેમ્બરે અજાણ્યા ઇસમનું માથું અને ધડ અલગ અલગ જગ્યાએથી મળી આવ્યો હતો. આથી પોલીસે ફોરેન્સિક પોસ્ટ મોર્ટમ માટે મૃતદેહને શહેરની સિવિલ હોસ્પિટલ ખાતે મોકલ્યો હતો. જેમાં મૃતકની ગળેફાંસો આપ્યા બાદ ગળું કાપી હત્યા કરવામાં આવી હોવાનું સામે આવ્યુ છે. ઈસમની હત્યા કરી હોવાનું સામે આવતા પોલીસે હત્યાનો ગુનો નોંધી તપાસ શરૂ કરી છે.

• 24 નવેમ્બરે ધડ અને માથું અલગ અલગ જગ્યાએથી મળ્યા હતા
• હત્યા બાદ માથું અને ધડને બાળી પુરાવા નાશ કરવાનો પ્રયાસ
• સિવિલ હોસ્પિટલમાં ફોરેન્સિક પી.એમ.બાદ હત્યા થઈ હોવાનું સામે આવ્યુ
• મૃતકની ઓળખ થઈ શકી નથી

સુરતઃ જિલ્લાના કામરેજ તાલુકાનાં દિગસ ગામની સીમમાં નહેરમાંથી અજાણ્યા યુવાનનું માથું તથા ખેતરમાંથી ધડ મળી આવ્યું હતું. આ ઘટનામાં કામરેજ પોલીસે સુરત સિવિલ હોસ્પિટલ ખાતે ફોરેન્સિક પી.એમ કરાવ્યુ હતું. પોસ્ટ મોર્ટમ બાદ જાણવા મળ્યું હતું કે, આ યુવાનની કોઈ અજાણ્યા શખ્સે હત્યા કરી હતી, હત્યા બાદ તમામ પુરાવાનો નાશ કરવા માથું તથા ધડને બાળવાની કોશિશ કરવામાં આવી હતી. આથી પોલીસે હત્યાનો ગુનો નોંધી વધુ તપાસ હાથ ધરી છે.

ધડ અને માથુ અલગ- અલગ જગ્યાએથી મળી આવ્યા

મળતી માહિતી અનુસાર 24 નવેમ્બરના રોજ કામરેજ તાલુકાનાં દિગસ ગામની સીમમાં વીર રેસીડન્સીની સામેથી પસાર થતી નહેરમાંથી અજાણ્યા યુવાનનું માથું મળી આવ્યું હતું. જ્યારે દિગસથી માછી જતાં રોડ ઉપર આવેલા એક ખેતર પાસેની નીકમાંથી ધડ મળી આવ્યું હતું. અજાણ્યા યુવાનની ધડ અને માથું કામરેજ પોલીસે કબ્જે કરી સુરત સિવિલ હોસ્પિટલ ખાતે ફોરેન્સિક પી.એમ કરાવા મોકલવામાં આવ્યુ હતું. જેમાં આ અજાણ્યા યુવાનનું ગળું કપાવાથી મૃત્યુ થયું હોવાનું પ્રાથમિક તપાસમાં જાણવા મળ્યું હતું.

તીક્ષ્ણ હથિયારથી ગળું કાપ્યું હોવાનું અનુમાન

અજાણ્યા યુવાનના ગળાના ભાગેથી અર્ધ બળેલા પ્લાસ્ટિકનો ટુકડો મળી આવ્યો હતો. આશરે 35 થી 40 વર્ષના જણાતા અજાણ્યા યુવાનને કોઈ શખ્સે ગળાના ભાગે પ્લાસ્ટિકથી ગળેફાંસો આપી હત્યા કરી, કોઈ તીક્ષ્ણ હથિયારથી ગળુ કાપવામાં આવ્યુ હોવાનું પોલીસે જણાવ્યું હતું. અજાણ્યા યુવાનના બંને હાથ અને પગમાં કોઈ બોથડ હથિયારથી ઇજા કરી કાપી નાંખ્યા હતા. આરોપીએ હત્યા કરી હોવાના પુરાવાનો નાશ કરવા માટે હાથ, પગ, માથું અને ધડ અલગ અલગ જગ્યાએ ફેંકી દીધા હતા.

મૃતકના હાથ અને પગ ગાયબ

આ ઘટનામાં મૃતક યુવાનના હાથ પગ મળી આવ્યા નથી. કોઈ અજાણ્યા શખ્સે અજાણ્યા યુવાનને ગળેફાંસો આપી ગળું કાપી હત્યા કરી હોવાનું બહાર આવતા કામરેજ પોલીસે ગુરુવારના રોજ હત્યાનો ગુનો નોંધી વધુ તપાસ હાથ ધરી છે. હાલ પોલીસે મૃતકની ઓળખ માટે તેના પરિવારજનોની શોધખોળ હાથ ધરી છે.