Surat Robbery: બંદૂકની અણીએ લૂંટ ચલાવી વૃદ્ધને કારમાંથી બહાર ફેંક્યા

સુરત શહેરમાં ધોળા દિવસે બંદૂકની અણીએ કારની લૂંટ થઈ છે. આ સમગ્ર ઘટના ત્યાં લાગેલા સીસીટીવી કેમેરામાં કેદ થઇ ગઈ છે. બીજી તરફ બનાવની જાણ થતા પોલીસ કાફલો ઘટના સ્થળે દોડી આવ્યો હતો. આ સમગ્ર મામલે તપાસ શરુ કરી છે.

• સુરતમાં ધોળા દિવસે બંદૂકની અણીએ કારની લૂંટ થઈ
• સમગ્ર ઘટના ત્યાં લાગેલા સીસીટીવી કેમેરામાં કેદ
• પોલીસ કાફલો ઘટના સ્થળે દોડી આવ્યો હતો

સુરત: શહેરના વેસુ વિસ્તારમાં આવેલા જોલી રેસિડેન્સીમાં રહેતા કપૂરચંદ જૈન તેમના પુત્ર સાથે હોસ્પિટલ ગયા હતા. આ પછી દવા લેવા માટે એક મેડીકલ પાસે ઉભા હતા. તે દરમિયાન વૃદ્ધ કારમાં બેઠા હતા ત્યારે એક ઇસમ કારમાં બેસી ગયો હતો અને બંદૂક બતાવી વૃદ્ધને કારમાંથી બહાર ફેંકી કાર લઈને ફરાર થઇ ગયો હતો. ધોળા દિવસે બનેલી આ ઘટનાથી સુરત શહરેમાં ચકચાર મચી જવા પામી છે. બીજી તરફ બનાવની જાણ થતાં પોલીસ કાફલો ઘટના સ્થળે દોડી આવ્યો હતો. તેમજ તપાસ શરુ કરી છે.

સમગ્ર ઘટના સીસીટીવીમાં કેદ

અજાણ્યા ઇસમેં બંદૂકની અણીએ કરેલી કારની લૂંટ ત્યાં લાગેલા સીસીટીવીમાં કેદ થઇ છે. જેમાં પરિવારના સભ્યો કોમ્પ્લેક્ષના પાર્કીંગમાં હતા. જયારે આધેડ રોડની સાઇડ પર કાર પાર્ક કરી રહ્યા હતા, ત્યારે એક લૂંટારૂ ઘસી આવ્યો હતો અને તમંચો બતાવી બળજબરી કરી ડ્રાઇવીંગ સીટ પર બેસી ગયો હતો. જયારે આધેડ ડ્રાઇવરની બાજુની સીટ પર બેસી ગયા અને લૂંટારૂને કારમાંથી ઉતારવાનો પ્રયાસ કર્યો હતો. આ દરમિયાન લૂંટારૂએ આધેડ સાથે ઝપાઝપી કરી કાર ચલાવવામાં આવતા આધેડ કારમાંથી નીચે પટકાયા હતા.

આરોપીએ વૃદ્ધને કારમાંથી બહાર ફેંક્યા

વેસુ સ્થિત જોલી રેસીડેન્સીમાં રહેતા કપૂરચંદ જૈનએ જણાવ્યું હતું કે, હું કારમાં બેઠો હતો. મારો પુત્ર દવા લેવા ગયો હતો. તે સમયે એક 20 વર્ષનો યુવક અચાનક આવીને ગાડીમાં બેસી ગયો હતો. મેં પૂછ્યું તું કોણ છે, તો તેણે તરત જ પિસ્તોલ બતાવી લીધી હતી. તેમજ કાર ચલાવવા લાગ્યો હતો. મેં હાથ પકડવાની કોશિશ કરી હતી તો મને ધક્કો મારી દીધો હતો જેથી હું નીચે પડી ગયો હતો. મેં બુમાંબુમ કરી હતી. જેથી મારો પુત્ર પણ દોડી આવ્યો હતો. પરંતુ ત્યાં સુધીમાં કાર લઈને અજાણ્યો ઈસમ ફરાર થઇ ગયો હતો. આ ઘટનામાં મને પગમાં પણ ઈજા થઇ છે.

આ પણ વાંચો:Surat Crime: જૂના પાર્ટનર દ્વારા એક્ટિવા સહિત 30 લાખ રૂપિયાના હીરાની ચોરી

મારી કોઈ સાથે દુશ્માવટ પણ નથી

પુત્ર મનોજએ જણાવ્યું હતું કે લગભગ 11.30 વિસ્તારની આ ઘટના છે. હું પિતાની દવા લેવા માટે આવ્યો હતો. પિતાને ગાડીમાં બેસાડ્યા હતા અને હું દવા લેવા ગયો હતો. હું દવા લઈને આવ્યો હતો ત્યાં સુધી આ ઘટના બની ચુકી હતી. મારી કોઈ સાથે દુશ્માવટ પણ નથી. આ ઘટના બાદ મેં તાત્કાલિક પોલીસને જાણ કરી હતી.