સામાન્ય વર્ગ ડુંગળી ખરીદી કરી શકે તે માટે માર્કેટમાં તુર્કી નામની ડુંગળી આવી છે. જે સાઈઝમાં ઘણી મોટી છે અને હોલસેલ ભાવમાં પ્રતિ 60થી 65 રૂપિયા કિલો વેચાઈ રહી છે. પરંતુ સાઈઝમાં તુર્કી ડુંગળી મોટી હોવાના કારણે અને સ્વાદમાં પણ તીખાશ અથવા મીઠાસ ન હોવાથી લોકો આ ડુંગળી ખરીદવાનું ટાળી રહ્યા છે.
છેલ્લા અઢી માસથી ડુંગળીના ભાવ લોકોને રડાવી રહ્યા છે અને ભાવ ઓછા થવાનું નામ નથી લાઇ રહ્યા. જેની પાછળ જવાબદાર કારણ કમોસમી વરસાદ પણ છે. નાશિકથી આવનારી તુર્કી ડુંગળીનો મોટો સ્ટોક હાલ સુરતની સરદાર માર્કેટમાં આવ્યો છે, પરંતુ સાઈઝમાં મોટી અને વજનમાં પણ ઓછી ઉતરવાના કારણે ખરીદી નહિવત પ્રમાણમાં જોવા મળી રહી છે. જેના કારણે વેપારી આલમમાં ડુંગળીના નહિવત ઉપાડને લઈ ચિંતાનું મોજું ફરી વળ્યું છે. આ ઉપરાંત આગામી દિવસોમાં હવે ડુંગળીના ભાવમાં ઘટાડો થવાની આશા પણ વેપારી આલમ દ્વારા વ્યક્ત થઇ રહી છે.
