પેટ્રોલ-ડીઝલના ભાવમાં વધારાના કારણે બાળગોપાલના વાઘા સહિત અન્ય સામગ્રીના ભાવમાં 10થી 12 ટકાનો વધારો

ગયા વર્ષે કોરોનાના કારણે એક પણ તહેવારની ઉજવણી થઇ શકી ન હતી, ત્યારે આ વર્ષે કોરોનાના કેસમાં ઘટાડો નોંધાતા કોરોનાની ગાઇડલાઇન સાથે તહેવારોની ઉજવણી કરવાની પરવાનગી આપવામાં આવી છે. આમ આ વર્ષે જન્માષ્ટમીના તહેવાર નજીક આવતા બાળગોપાલના વાઘા સહિતની વસ્તુઓ ખરીદવામાં ભીડ જામી છે. ત્યારે આ વર્ષે પેટ્રોલ-ડીઝલના ભાવમાં વધારાના કારણે બાળગોપાલના વાઘા સહિત અન્ય સામગ્રીના ભાવમાં 10થી 12 ટકાનો વધારો પણ જોવા મળ્યો છે.

• કોરોનાની લહેર ઓછી થતા બજારોમાં ખરીદીનો દૌર ફરીથી શરૂ થતાં વેપારીઓમાં ખુશી છવાઈ
• કોલકત્તાના કારીગરો દ્વારા તૈયાર વાઘાની ડિમાન્ડ
• વાઘાની અલગ-અલગ વેરાઈટી સાથે તેમના માટે વિવિધ પ્રકારના હીંચકાઓ પણ છે

સુરત : પેટ્રોલ-ડીઝલના ભાવ વધારાની અસર આ વર્ષે જન્માષ્ટમી પર્વ પર પણ જોવા મળી રહી છે. વાઘા સહિત અન્ય સામગ્રીના ભાવમાં 10થી 12 ટકાનો વધારો થયો છે. જો કે, વેપારીઓ ગત બે વર્ષ કરતા 40 ટકા વધુ ઘરાકી હોવાનું જણાવી રહ્યા છે. કોરોનાના કારણે થયેલા નુક્સાનની ભરપાઈ જન્માષ્ટમીનો તહેવાર કરશે એવી આશા વેપારીઓ સેવી રહ્યા છે. બીજી બાજુ આ વખતે બજારમાં કલકત્તાના કારીગરો દ્વારા તૈયાર વાઘાની ડિમાન્ડ છે કારણ કે, તે સંપૂર્ણપણે હેન્ડ મેડ છે.

આ પણ વાંચો- #KrishnaJanmashtami2020 : આજે દેશભરમાં ભગવાન કૃષ્ણના જન્મની થશે ઉજવણી

જન્માષ્ટમીના તહેવારની ખરીદીમાં બજારોમાં ભીડ જોવા મળી

કોરોના મહામારીના પગલે વેપાર-ધંધા અને રોજગારને માઠી અસર પડયા બાદ હવે કોરોનાની લહેર ઓછી થતા બજારોમાં ખરીદીનો દૌર ફરીથી શરૂ થતાં વેપારીઓમાં ખુશી છવાઈ છે. રક્ષાબંધન બાદ હવે જન્માષ્ટમીના તહેવારની ખરીદી નીકળતા બજારોમાં ભીડ જોવા મળી રહી છે. જેથી વેપારીઓમાં ખુશીનો માહોલ છે. જન્માષ્ટમીના તહેવારને હવે બે-ત્રણ દિવસ જ બાકી છે, ત્યારે ભક્તો તેમના વાઘાથી લઈને હીંચકાની ખરીદી કરી રહ્યા છે.

ભાવ વધારો

પરંપરાગત જરદોશી, ડાયમંડ, એમ્બ્રોડરી તેમજ કલકત્તી વાઘા

બજારમાં ભગવાન શ્રીકૃષ્ણના વાઘાની અલગ-અલગ વેરાયટી સાથે તેમના માટે વિવિધ પ્રકારના હીંચકાઓ પણ છે. જો કે, ખાસ કરીને ભગવાનના વાઘાની વાત કરવામાં આવે તો બજારમાં બાળગોપાલના પરંપરાગત જરદોશી, ડાયમંડ, એમ્બ્રોડરી તેમજ કલકત્તી એમ અલગ-અલગ વર્કમાં વાઘા જોવા મળી રહ્યા છે. તેમાં પણ ખાસ કરીને જરદોશી અને કલકત્તી વાઘાની કારીગરી અને કલર કોમ્બિનેશનને લઈને માંગ વધુ છે. આ સિવાય થાળ ધરાવવાની થાળીથી લઈને પૂજાની અન્ય સામગ્રીઓની પણ ખરીદી વધુ છે.

ભાવ વધારો

આ પણ વાંચો- Janmashtami 2020: ક્યારે કરવામાં આવશે જન્માષ્ટમીની ઉજવણી, જાણો શું કહે છે પંચાંગ

મૂંગટ તેમજ માળા જેવી એસેસરીઝનું પણ વેચાણ

વેપારી પ્રગ્નેશ ઠક્કરે જણાવ્યું હતું કે, આ વર્ષે અમે ખાસ કલકત્તાના કારીગરો પાસે હેન્ડ વર્કના વાઘા તૈયાર કરાવ્યા છે. જેથી એ કારીગરોને પણ રોજગાર મળી રહે. રૂપિયા 50થી લઈને રૂપિયા 2000 સુધીના વાઘા લોકો ખરીદી રહ્યા છે. લોકોની આવી ડિમાન્ડના કારણે કાનાના રમકડા, પારણા અને મૂંગટ તેમજ માળા જેવી એસેસરીઝનું પણ વેચાણ થઈ રહ્યું છે. જો કે, પેટ્રોલ-ડીઝલના ભાવમાં વધારો થતાં ગત વર્ષ કરતા પૂજાની સામગ્રી અને વાઘાના ભાવમાં 10થી 12 ટકાનો વધારો છે, તેમ છતાં ખરીદી વધુ જોવા મળી રહી છે.