સુરતઃ કોરોના વાયરસના પગલે છેલ્લા બે માસથી ચાલી રહેલા લોકડાઉનના કારણે સામાન્ય વર્ગથી લઈ નાના વ્યવસાયિકોની હાલત કફોડી બની છે. તે દરમિયાન આવા લોકોને આત્મનિર્ભર કરવા રાજ્ય સરકારે એક પ્રયાસ કરી રૂપિયા 1 લાખ સુધીની લોન આપવામાં "આત્મનિર્ભર યોજનાની જાહેરાત કરી છે. આ યોજનાના ફોર્મનું વિતરણ ગુરૂવારથી શહેરની સહકારી, ક્રેડિટ તેમજ ડિસ્ટ્રીકટ સહિત કો-ઓપરેટિવ બેંકો પરથી કરવામાં આવી રહ્યું છે.
સુરતની સહકારી બેંકોમાં આત્મનિર્ભર લોન યોજનાના ફોર્મ મેળવાવા લાંબી લાઇનો સુરતની વરાછા કો-ઓપરેટિવ બેંક બહાર સવારના દસ વાગ્યાથી લોકોની લાંબી કતારો જોવા મળી. અહીં આત્મનિર્ભર યોજનાના ફોર્મ મેળવવા લોકોએ રીતસરનો ઘસારો કર્યો હતો. બેંક દ્વારા પણ લોકો વચ્ચે સોશિયલ ડિસ્ટનસિંગ જળવાય તેવા પ્રયાસ કર્યા હતા. બેંક પર ફોર્મ મેળવવા મોટા ભાગના દરજી, પાનના ગલ્લા વાળા, વાળંદ સહિત ફેરિયાઓ જોવા મળ્યા હતા તેઓએ જણાવ્યું કે, રાજ્ય સરકારની આ જાહેરાત સામાન્ય વર્ગ માટે આશીર્વાદ સમાન બની રહેશે. બે માસથી જે કામ-ધંધા બંધ હોવાના કારણે જે હલાકીઓ પડી તેની ભરપાઈ હવે લોનના રૂપિયાથી કરવી પડશે.
